06.11.2026 | 23:24
Նոյեմբերի 7-ին ՊԵԿ էլեկտրոնային համակարգերը երկու ժամով անհասանելի կլինեն
1,4 միլիոն ֆայլ․ հաքերները հրապարակել են Բեռլինի Սենատից գողացված տվյալները
Քաղաքականություն
05.09.2026 | 17:31
Հաքերները «դարքվեբում» հրապարակել են Բեռլինի Սենատի կիբերհարձակման հետևանքով գողացված տվյալները։ Խոսքը շուրջ 1,4 միլիոն ֆայլի կամ 5,8 տերաբայթ տվյալների մասին է։ Դրանք հրապարակվել ենո, երբ լրացել է հաքերների կողմից սահմանված ժամկետը՝ պահանջված գումարը վճարելու համար։
Գողացված տվյալների թվում են Գերմանիայի մայրաքաղաքի վարչակազմի աշխատակիցների անձնական հեռախոսահամարներն ու փաստաթղթերը։ Դեռևս հայտնի չէ՝ հրապարակված տվյալները ներառում են արդյոք կիբերհարձակման հետևանքով գողացված ամբողջ տեղեկատվությունը։ Գերմանական Deutschlandfunk-ի տվյալներով՝ գողացված տվյալների առնվազն մի մասը վերաբերում է անվտանգության ոլորտին։
Գերմանիայի տեղեկատվական անվտանգության դաշնային վարչությունը (BSI) նախազգուշացրել է, որ տվյալների արտահոսքը կարող է տարբեր ռիսկեր ստեղծել տուժած անձանց և, ի վերջո, հասարակության համար։ Կառույցը նաև ընդգծել է, որ տվյալների հրապարակումը հատկապես զգայուն է՝ հաշվի առնելով Բեռլինի Ներկայացուցիչների պալատի և շրջանային խորհուրդների ընտրություններին մնացած կարճ ժամանակը։
Օգոստոսի կեսերին կիբերհարձակման էին ենթարկվել Բեռլինի Սենատի քաղաքաշինության և տրանսպորտի ու շրջակա միջավայրի հարցերով վարչությունները։ Հարձակման համար պատասխանատվությունը ստանձնել էր Rhysida հաքերային խմբավորումը։
Հաքերները քաղաքային իշխանություններից պահանջել էին 30 բիթքոին՝ մոտ 2 միլիոն եվրո՝ գողացված տվյալները վերադարձնելու և դրանք չհրապարակելու դիմաց։ Բեռլինի իշխանությունները հրաժարվել էին վճարել պահանջված գումարը։
