«Հնարավորություն կա». Պուտինը՝ Ուկրաինայում պատերազմի խաղաղ կարգավորման մասին

ՌԴ նախագահ Վլադիմիր Պուտինը  կրկին հայտարարել է, որ հնարավոր է համարում Ռուսաստանի կողմից արդեն հինգերորդ տարին Ուկրաինայի դեմ վարվող  պատերազմի խաղաղ կարգավորումը, գրում է BBC-ի ռուսական ծառայությունը։

«Առաջին հերթին Ռուսաստանն ու  Ուկրաինան պետք է համաձայնության գան։ Մյուս երկրները պատրաստ են աջակցել և օգնել, այդ թվում՝ ԱՄՆ-ն ու Չինաստանը», – Վլադիմիր Պուտինը հայտարարել է Վլադիվոստոկում ընթացող Արևելյան տնտեսական համաժողովի լիագումար նիստում։

«(Խաղաղ կարգավորման) հնարավորություն կա՞։ Այո՛, իմ կարծիքով՝ կա»,-հավելել է Պուտինը։

Ավելի վաղ, անդրադառնալով պատերազմի ավարտին, Ռուսաստանի նախագահը հայտարարել էր, որ դրա համար Մոսկվան ձգտելու է հասնել «հատուկ ռազմական գործողության նպատակներին», այդ թվում՝ Դոնբասի նկատմամբ լիակատար վերահսկողության հաստատմանը, այսինքն՝ նաև այն տարածքների, որոնք շարունակում է վերահսկել Ուկրաինան։

Պուտինը նաև հայտարարել է, որ Ռուսաստանի և Ուկրաինայի միջև կապերը պահպանվում են, առաջին հերթին՝ հատուկ ծառայությունների գծով։ Սակայն, նա նշել է, որ հաշվի առնելով Կիևի վերջին հայտարարությունները, դժվար է դատել, թե դրանք որքանով են տանում դեպի խաղաղ կարգավորում։

BBC-ն նշում է, որ  նա, հավանաբար, նկատի է ունեցել Ուկրաինայի նախագահ Վլադիմիր Զելենսկիի՝ սեպտեմբերի 1-ի հայտարարությունը, ըստ որի՝ Ռուսաստանի տարածքում Կիևի կողմից անօդաչու թռչող սարքերի հարձակումների ակտիվացման պատճառով «ռուսական երկինքը դառնում է լիովին վտանգավոր»։

Պուտինը ավելի վաղ  Զելենսկու նման խոսքերը որակել էր որպես «պետական ահաբեկչություն»։ Ելույթ ունենալով Արևելյան տնտեսական ֆորումի նիստում՝ նա կրկնել է, որ «քաղաքացիական օդանավերի վրա հարձակումները համարում է պետական ահաբեկչության դրսևորում» և հավելել, որ Ուկրաինայի կողմից քաղաքացիական ավիացիային ուղղված սպառնալիքները բարդացնում են երկկողմ խաղաղ բանակցություններ անցկացնելու հնարավորությունները։

Թարգմանությունը՝ Էմմա Չոբանյանի