Ռուսական գիտահետազոտական ​​նավը Նորվեգիայում կալանվել է՝ ուկրաինական «Նավթոգազի» պահանջով

Նորվեգիայի Նուր-Թրոմս և Սենյա շրջանային դատարանը օգոստոսի 31-ին որոշել է կալանքի տակ առնել ռուսական «Պրոֆեսոր Մոլչանով» նավը՝ Ուկրաինայի պետական «Նավթոգազ» ընկերության դիմումի հիման վրա․ գրում է Current time-ը։

Ընկերությունից հայտնել են, որ նավի կալանքը պետք է ապահովի արբիտրաժային որոշման կատարումը, որով Ռուսաստանից պահանջվում է «Նավթոգազին» վճարել շուրջ 4,22 միլիարդ դոլար, ինչպես նաև տոկոսներ և դատական ծախսեր՝ բռնակցված Ղրիմում ընկերության ակտիվների ապօրինի զավթման համար։

«Սա արդարության վերականգնման ուղղությամբ ևս մեկ կարևոր քայլ է։ Մենք շարունակելու ենք ամբողջ աշխարհում ռուսական ակտիվների որոնումը, քանի դեռ «Նավթոգազին» և խմբի մյուս ընկերություններին շնորհված փոխհատուցումը չի վճարվել»,- հայտարարել է «Նավթոգազի» վարչության նախագահի պաշտոնակատար Սերգեյ Ֆեդորենկոն։

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ նավի կալանքին «համապատասխան արձագանք կհետևի»։

«Պրոֆեսոր Մոլչանովը» օգտագործվում է առևտրային արշավախմբային զբոսաշրջային ուղևորությունների համար։ Ռուսաստանի Հեռավոր Արևելքի և Արկտիկայի զարգացման նախարար Ալեքսեյ Չեկունկովը հայտնել է, որ Ռոսհիդրոմետին պատկանող նավը ներգրավված է եղել Շպիցբերգեն արշիպելագում գործող «Արկտիկուգոլ» տրեստի հետ կապի ապահովման համար։

Նրա խոսքով՝ «նավն ու անձնակազմը ֆիզիկական անվտանգության մեջ են», իսկ իրավաբանները բողոքարկելու են նորվեգական դատարանի որոշումը։ Նավին արգելվել է լքել Բարենցբուրգի նավահանգիստը։

2023 թվականին «Նավթոգազի» այն ժամանակվա ղեկավար Ալեքսեյ Չեռնիշովը հայտնել էր, որ Հաագայի միջազգային արբիտրաժը Ռուսաստանին պարտավորեցրել է ընկերությանը վճարել 5 միլիարդ դոլար՝ բռնակցված Ղրիմում կրած վնասների և կորցրած գույքի համար։ Reuters-ի տվյալներով՝ խոսքը 4,22 միլիարդ դոլարի, ինչպես նաև տոկոսների և դատական ծախսերի մասին է։

Այն ժամանակ «Նավթոգազից» հայտարարել էին, որ որոշումը կարող է հարկադրաբար կատարվել։ Եթե Ռուսաստանը հրաժարվի վճարել կամավոր, ապա 1958 թվականի Նյու Յորքի կոնվենցիայի համաձայն՝ «Նավթոգազը» կարող է սկսել արբիտրաժային վճռի հարկադիր կատարման գործընթաց այն երկրներում, որտեղ կան ռուսական ակտիվներ։

Թարգմանությունը՝ Էմմա Չոբանյանի