Էրդողանը հայտարարել է, որ Թուրքիան և ՌԴ-ն «Աքքույուից» հետո քայլեր կձեռնարկեն նոր ատոմակայանների ուղղությամբ

Ռուսաստանի նախագահ Վլադիմիր Պուտինը Բիշքեկում Շանհայի համագործակցության կազմակերպության գագաթնաժողովի շրջանակներում հանդիպել է Թուրքիայի նախագահ Ռեջեփ Թայիփ Էրդողանի հետ։

Թուրքական լրատվամիջոցների հաղորդմամբ՝ Էրդողանը հայտարարել է, որ «Աքքույու» ատոմակայանի ավարտից և շահագործման հանձնելուց հետո Թուրքիան և Ռուսաստանը քայլեր կձեռնարկեն նաև այլ ատոմակայանների կառուցման ուղղությամբ։

«Ես նույնպես շատ կարևոր եմ համարում այսօր այս հնարավորությունն ունենալը՝ շփվելու հարգարժան նախագահի հետ։ Թուրք-ռուսական հարաբերություններն իսկապես շատ ավելի բարձր մակարդակի վրա են, քան նախորդ որևէ ժամանակահատվածում։ Ռուս զբոսաշրջիկների կարևորությունը Թուրքիայում զգալիորեն մեծ է։ Այսօր մեր Անթալիայի նահանգի ամենակարևոր զբոսաշրջային հոսքը կազմված է Ռուսաստանից եկած զբոսաշրջիկներից։

Բացի այդ, ինչպես նախագահը հենց նոր նշեց, «Աքքույու» ատոմակայանը մեծ նշանակություն ունի Թուրքիա-Ռուսաստան հարաբերություններում։ Մենք այժմ գտնվում ենք «Աքքույու» ատոմակայանի կառուցման վերջին փուլում։ Այժմ մենք սպասում ենք Աքքույուի ատոմակայանի ավարտին և բացմանը։ Որովհետև ատոմակայանի բացմամբ մենք միասին քայլեր կձեռնարկենք մի քանի նոր էլեկտրակայաններ բացելու համար։ Մենք ունենք ամուր գործընկերություն գյուղատնտեսության և էներգետիկայի ոլորտներում», – հայտարարել է Թուրքիայի նախագահը։

Իր հերթին Պուտինը հայտարարել է, որ Թուրքիան Ռուսաստանի արտոնյալ գործընկերներից է։

«Թուրքիան մեր արտոնյալ գործընկերներից մեկն է՝ ինչպես արտաքին քաղաքականության, այնպես էլ տնտեսական ոլորտում», – ասել է ՌԴ նախագահը։

Նա նաև վստահություն է հայտնել, որ «Ռոսատոմ» պետական կորպորացիան 2026 թվականին կգործարկի «Աքքույու» ատոմակայանի առաջին էներգաբլոկը՝ ինչպես նախատեսված էր։

«Դուք մեր ընկերության՝ «Ռոսատոմի», առաջ նպատակ եք դրել այս տարի գործարկել առաջին բլոկը։ Եվ այդպես էլ կլինի. ընկերությունը գործում է ըստ ժամանակացույցի»,- հավելել է նա։

Թարգմանությունը՝ Էմմա Չոբանյանի