Թուրքիան կշարունակի իր ներդրումն ունենալ Ադրբեջան-Հայաստան խաղաղության գործընթացում․ Էրդողանն ու Ալիևը հանդիպել են Բիշքեկում

Սեպտեմբերի 1-ին Ղրղզստանի մայրաքաղաք Բիշքեկում  Շանհայի համագործակցության կազմակերպության  գագաթնաժողովի շրջանակներում կայացել է Ադրբեջանի  նախագահ Իլհամ Ալիևի հանդիպումը Թուրքիայի  նախագահ Ռեջեփ Թայիփ Էրդողանի հետ։

Ինչպես հայտնում են ադրբեջանական լրատվամիջոցները, զրույցի ընթացքում ընդգծվել է, որ ադրբեջանա-թուրքական երկկողմ հարաբերությունները հիմնված են եղբայրության և ռազմավարական դաշնակցության վրա, ինչպես նաև գոհունակություն է հայտնվել բոլոր ուղղություններով կապերի հետագա ընդլայնման կապակցությամբ։

Հատկապես ընդգծվել է, որ երկու երկրները, «Մեկ ազգ, երկու պետություն» սկզբունքին համապատասխան, միշտ միմյանց կողքին են թե՛ լավ, թե՛ դժվար օրերին։

Հանդիպման ընթացքում մտքեր են փոխանակվել տարածաշրջանային խաղաղության և կայունության հետագա ամրապնդման հարցերի շուրջ։

Երկու երկրների ղեկավարները քննարկել են նաև դաշնակցային հարաբերությունների զարգացման հեռանկարները, տարածաշրջանային օրակարգը և փոխադարձ հետաքրքրություն ներկայացնող այլ հարցեր։

Թուրքական կողմի հաղորդմամբ՝ Էրդողանը  հանդիպում  է ունեցել Ադրբեջանի նախագահի հետ այն հյուրանոցում, որտեղ կանգ է առել։

Առաջնորդները քննարկել են Թուրքիայի և Ադրբեջանի միջև երկկողմ հարաբերությունները, ինչպես նաև տարածաշրջանային և համաշխարհային զարգացումները։

Էրդողանը հանդիպման ժամանակ նշել է, որ Թուրքիայի և Ադրբեջանի կողմից ձեռնարկված համագործակցության քայլերի արժեքը, մասնավորապես էներգետիկայի, ենթակառուցվածքների և տրանսպորտի ոլորտներում, ավելի լավ է հասկացվում  տարածաշրջանի մթնոլորտում, և որ  երկու երկրների հարաբերությունների խորացումը բոլոր ոլորտներում՝ «երկու պետություն, մեկ ազգ» սկզբունքով, օգուտ  է բերում երկու երկրներին։

«Մեր նախագահը նշել է, որ Թուրքիան միշտ կշարունակի իր ներդրումն ունենալ Ադրբեջան-Հայաստան խաղաղության գործընթացում, և որ ձեռք բերված խաղաղությունը կենսական նշանակություն կունենա մեր տարածաշրջանի համար։ Հանդիպման ընթացքում նախագահ Էրդողանը Ադրբեջանի նախագահ Ալիևին հրավիրել է Անթալիայում կայանալիք COP31 գագաթնաժողովին»,-ասվում է trthaber-ի տարածած հաղորդագրության մեջ։

Թարգմանությունը՝ Էմմա Չոբանյանի