Թրամփը հայտարարել է, որ իրանական Խարգ կղզին «փշուր-փշուր է արվում»

Իրանի էներգետիկ հանգույց հանդիսացող Խարգ կղզին «փշուր-փշուր է արվում»։ Այս մասին հայտարարել է ԱՄՆ նախագահ Դոնալդ Թրամփը՝ այն բանից հետո, երբ ամերիկյան ուժերը մեկ այլ՝ Լարեկ կղզում խոցել են երկու հրթիռային կայանք։ Սա հուլիսի վերջից ի վեր ԱՄՆ-ի կողմից Իրանի դեմ իրականացված առաջին հայտնի հարվածն է, գրում է France 24-ը։

Խարգ կղզու վրա հարձակումը, որը փետրվարի 28-ին սկսված պատերազմից առաջ ապահովում էր Իրանի նավթի արտահանման շուրջ 90%-ը, կարող է լրջորեն խաթարել Իսլամական Հանրապետության էներգակիրների առևտուրը և մեծ ճնշում գործադրել երկրի տնտեսության վրա։

«Խարգ կղզին պայթեցնելով փշուր-փշուր է արվում»,- գրել է Թրամփը սոցիալական ցանցում՝ առանց հավելյալ մանրամասներ ներկայացնելու և կից ԱԲ տեսանյութ հրապարակել։

Այս գրառումն արվել է այն բանից հետո, երբ Թրամփը Fox News-ին տված հարցազրույցում կրկին հայտարարել է, որ Իրանը երբեք չպետք է միջուկային զենք ձեռք բերի՝ երկրի ղեկավարությանը բնութագրելով որպես «բռնի, չար մարդիկ»։

«Չի կարելի թույլ տալ, որ նրանք միջուկային զենք ունենան, և նրանք միջուկային զենք չեն ունենա»,- ասել է Թրամփը Fox News-ին։

Նա պնդել է, որ եթե Թեհրանը միջուկային զենք ձեռք բերեր, ապա այն կօգտագործեր՝ հայտարարելով, որ Մերձավոր Արևելքը «փաստացի կվերանար», իսկ Իսրայելը կկործանվեր, հաջորդ թիրախներն էլ կարող էին դառնալ ԱՄՆ-ը կամ Եվրոպան։

«Եթե ես նախագահ չլինեի, Իսրայելը կվերանար։ Իսրայել չէր լինի։ Եվ, հավանաբար, Մերձավոր Արևելքն էլ չէր լինի»,- հավելել է նա։

Թրամփը նաև հայտարարել է, որ ԱՄՆ-ը զգալի վնաս է հասցնում Իրանին և բարձր է գնահատել Իրանի դեմ արդյունավետ շրջափակումը․ «Մենք հիանալի աշխատանք ենք կատարում։ Շրջափակումն անհավանական է եղել, մենք շատ ուժեղ հարվածներ ենք հասցնում նրանց։ Ոչ ոք երբևէ նման հարվածների չի ենթարկվել»։

Թրամփն Իրանն անվանել է «ձախողվող պետություն» և ասել, որ զարմացել էր, երբ պատերազմի սկզբում Թեհրանը սկսել  է թիրախավորել Պարսից ծոցի երկրները։

Միաժամանակ, նշվում է, որ Իրանի Խարգ կղզում նավթային գործողությունները չեն դադարել։ Այս մասին հայտարարել է Իրանի ազգային նավթային ընկերության գործադիր տնօրեն Համիդ Բովարդը։ Նա հերքել է, որ նավթային կարևոր հանգույցը ոչնչացվում է, ինչպես ավելի վաղ հայտարարել էր ԱՄՆ նախագահ Դոնալդ Թրամփը սոցիալական ցանցերում գրառման մեջ։

«Թրամփի թվիթները ծիծաղելի են, իսկ Խարգում պայմանները հանգիստ և նորմալ են »,- ասել է նա՝ հավելելով, որ կղզին անցյալում բազմիցս ռմբակոծվել է ԱՄՆ-ի և Իսրայելի ուժերի կողմից, սակայն նավթագործները թույլ չեն տվել, որ գործողությունները դադարեցվեն «նույնիսկ մի պահ»։

Ըստ նրա՝ կապալառուները ներկայում վերակառուցում և արդիականացնում են պահեստարաններն ու նավամատույցները։

Թարգմանությունը՝ Էմմա Չոբանյանի