Եթե էսօր մենք չասենք Քյարքի, նշանակում է` Ջերմուկի օկուպացված տարածքներից հրաժարվում ենք․ Փաշինյան․ ՏԵՍԱՆՅՈՒԹ

Վարչապետ Նիկոլ Փաշինյանը լրագրողների հետ ճեպազրույցում հայտարարեց, որ Տիգրանաշենը Քյարքի անվանելով արձանագրել է դրա գոյությունը։

Նրա խոսքով՝ Հայաստանի միջազգայնորեն ճանաչված 29 հազար 743 քառակուսի կիլոմետր տարածքի մեջ Ադրբեջանի երեք անկլավային տարածքները չեն ներառվում, մինչդեռ Արծվաշենը ներառվում է։

«Ես վերադարձի մասին չեմ խոսել, ես ընդամենը ասել եմ՝ Քյարքի։ Ես ասել եմ Քյարքի՝ արձանագրելով, որ կա այդպիսի տարածք»,- ասաց նա։

Վարչապետի խոսքով՝ անկլավների թեման բարձրաձայնելու իր նպատակը ոչ թե նոր կոնֆլիկտ ստեղծելն է, այլ հակառակը՝ դրա շուրջ հնարավոր էսկալացիան կանխելը։

Նրա խոսքով՝ կան ներքին և արտաքին ուժեր, որոնք փորձում են գտնել խաղաղությունը փլուզելու և էսկալացիա առաջացնելու հնարավոր կետեր։

«Ես տեսնում եմ, որ կան մի քանի կետեր, որի նյարդը փորձ է արվում և կարվի օգտագործել՝ փլուզելու համար խաղաղությունը, էսկալացիա մտցնելու համար։ Ես էդ թեմայի նյարդը հանում եմ, որպեսզի դա հնարավոր չլինի դրա շուրջ էսկալացիա կառուցել»,- նշեց վարչապետը։

Նրա խոսքով՝ Հայաստանի և Ադրբեջանի միջև առկա է սահմանազատման գործընթաց, որի շրջանակում պետք է քննարկվեն նաև առաջացող խնդիրները։

«Եթե մենք այսօր չասենք Քյարքի, նշանակում է՝ մենք Ջերմուկի էդ օկուպացված տարածքներից հրաժարվում ենք։ Որովհետև առաջ է գալիս սկզբունք՝ ինչ գրավել է, դե իրենն է, դե գրավել են, գրավել են։ Եվ երկրորդ՝ դա կոնֆլիկտային սկզբունք է»,- ասաց Փաշինյանը։

Մանրամասները՝ տեսանյութում:

Արփի Հակոբյան