Քաղաքականություն
26.08.2026 | 16:03Թշնամու ԶՈՒ-Ն Սյունիքից 160 կմ հեռավորության վրա էր, հիմա որոշ տեղերում 10-15 մետրի վրա է։ Այս մասին խորհրդարանում հայտարարեց Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի թեկնածու Իրինա Յոլյանը՝ պատասխանելով ՔՊ պատգամավոր Արման Եղոյանի հարցերին։
Եղոյանը հիշատակեց 2016 թվականի ռուսական կողմի առաջարկները (5 շրջանների, այդ թվում՝ Կուբաթլուի վերադարձը)՝ պնդելով, որ սահմանն իր տեղում է մնացել, փոխվել է շփման գիծը։
«2016-ի հունվարին ՌԴ-ի կողմից ներկայացվել էր առաջարկ՝ 5 շրջանների վերադարձ, որի մեջ էր նաև Կուբաթլին, որը սահմանակից է Սյունիքին՝ Խնձորեսկից 5.5-6 կմ։ Ի՞նչ պետք է պատասխաներ Հայաստանը՝ այո՞, թե՞ ոչ։ Եթե այո, զորքերը պիտի կանգնեին ՀՀ սահմանին, ինչպես հիմա է»,- հարցրեց իշխանական պատգամավորը։
Հարցին ի պատասխան Իրինա Յոլյանն ընդգծեց, որ գործող իշխանության վարած քաղաքականությունը հանգեցրել է Սյունիքի անմիջական անվտանգային սպառնալիքի։
«Թշնամու զինված ուժերը Սյունիքից 160 կմ հեռավորության վրա էին, հիմա որոշ բնակավայրերում զինված ուժերն ընդամենը 10-15 մետրի վրա են։ Դա փաստ է, որը չեք կարող հերքել։ Դուք ունեիք պատմական շանս՝ Հայաստանը զարգացման տանելու, բայց այն հայրենիքը, որ ժառանգել էիք, այս քարտեզի տեսքը չուներ։ Դուք ժողովրդի թիկունքում որոշումներ կայացրիք։ Բանակցություններում ամեն ինչ կախված է նրանից, թե դուք պարտվողի ու զիջողի՞ դիրքից եք բանակցում, թե՞ ուժեղի»,- ասաց ընդդիմադիր պատգամավորը։
Մանրամասները՝ տեսանյութում։
Անի Թամրազյան
