26.08.2026 | 14:43
Խոզանի և բուսական մնացորդների այրումը վտանգում է կենսաբազմազանությունը․ ՇՄՆ
Ես 21 տարեկանում միլիոնատեր չեմ եղել. Լևոն Քոչարյան. ՏԵՍԱՆՅՈՒԹ
Քաղաքականություն
26.08.2026 | 14:03
Լևոն Քոչարյանը, անդրադառնալով Նիկոլ Փաշինյանի հայտարարությանը, թե ինչու է ինքը միլիոնատեր, Factor TV-ի հարցին ի պատասխան նշեց, որ ունեցվածքի ծագման վերաբերյալ բոլոր հարցերի պատասխանը կտրվի դատարանում։
«Կա գործ, որի շրջանակներում ամեն ինչ կոպեկ առ կոպեկ երևալու է և ցույց է տրվելու»,– ասաց Քոչարյանը՝ ընդգծելով, որ վաղ հասակից իր եղբայրը՝ Սեդրակ Քոչարյանը, իսկ հետագայում նաև ինքը զբաղվել են բիզնես գործունեությամբ։
Քոչարյանը հերքեց, որ իր հարստությունը ձևավորվել է օրենքից դուրս ճանապարհով։ Նա նաև նշեց, որ չի կարող հստակ ասել՝ որ տարիքից է դարձել միլիոնատեր, քանի որ չի հասկանում, թե ինչ մեթոդաբանությամբ են իշխանության ներկայացուցիչները հաշվարկում իր ունեցվածքը։
«Ես միլիոնատեր չեմ եղել 21 տարեկանում, շատ հեռու եմ եղել միլիոնատեր լինելուց»,– ասաց նա։
Քոչարյանի խոսքով՝ իր ունեցվածքի գնահատման հարցում պետք է հաշվի առնել նաև այն հանգամանքը, որ որևէ ընկերությունում ունեցած մասնակցության արժեքը ժամանակի ընթացքում կարող է էապես աճել։
«Դու պայմանական ունես ինչ-որ գույք կամ ինչ-որ ընկերության մեջ մասնաբաժին և ժամանակի հետ կարող է արժեքը բարձրանալ։ Դու չես նստում ամեն օր հաշվում՝ քո մասնակցությունը ընկերությունում էդ պահի դրությամբ ինչ արժեք է իրենից ներկայացնում»,- ասաց ընդդիմադիր պատգամավորը:
Նա ընդգծեց, որ իր ունեցած գույքը հայտարարագրված է, և գաղտնի ոչինչ չկա:
Քոչարյանը նաև անդրադարձավ Նիկոլ Փաշինյանի այն հայտարարությանը, թե ինքը ութ տարի վարչապետ լինելով՝ միլիոնատեր չէ, մինչդեռ Ռոբերտ Քոչարյանը 10 տարի նախագահելով` միլիարդատեր է: Նա ասաց, որ չի կարող հաստատել, թե իրականում Փաշինյանն ինչ ունեցվածք ունի` ընդգծելով, որ դա միայն հետագայում պարզ կդառնա:
Անդրադառնալով Կասկադում հողի ձեռքբերման և դրանից ստացված 1.7 միլիարդ դրամի օգուտի մասին մեր հարցին՝ Քոչարյանը հրաժարվեց մեկնաբանել` պատճառաբանելով նախաքննական գաղտնիքը։
«Ընդհանուր գործը ու մոտիվացիան, այս գործի ընթացքը ամբողջությամբ քաղաքական է»,- ասաց նա՝ հավելելով, որ եթե նախաքննական գաղտնիքը չլիներ, այդ հարցերի վերաբերյալ շատ բան հնարավոր կլիներ բացատրել։
Մանրամասները` տեսանյութում:
Արփի Հակոբյան
