Զելենսկին Մասկին պարգևատրել է Ազատության շքանշանով՝ երկրի բարձրագույն պարգևներից մեկով

Ուկրաինայի նախագահ Վլադիմիր Զելենսկին ամերիկացի միլիարդատեր, գործարար Իլոն Մասկին պարգևատրել է Ազատության շքանշանով։ Այս մասին ասվում է Ուկրաինայի ղեկավարի օգոստոսի 26-ի հրամանագրում, գրում է Европейская правда-ն։

Հրամանագրի համաձայն՝ Իլոն Մասկը պարգևատրվել է Ազատության շքանշանով՝ «մարդկանց կյանքի և ազատության պաշտպանության գործում ունեցած ակնառու անձնական ծառայությունների, ինչպես նաև Ուկրաինայի և Ամերիկայի Միացյալ Նահանգների ժողովուրդների միջև հարաբերությունների զարգացման համար»։

«Ազատության շքանշանով պարգևատրել Իլոն Մասկին՝ ձեռնարկատիրոջը, ինժեներին, «SpaceX» և «Tesla» ընկերությունների ղեկավարին, Ամերիկայի Միացյալ Նահանգներ»,- ասվում է նախագահի հրամանագրում։

Ըստ ԶԼՄ-ների՝ հուլիսի 28-ին Սպիտակ տանը ԱՄՆ նախագահ Դոնալդ Թրամփի հետ հանդիպման ժամանակ Ուկրաինայի նախագահ Վլադիմիր Զելենսկին իր ամերիկացի գործընկերոջը խնդրել էր դիմել Իլոն Մասկին՝ Ուկրաինային թույլատրելու Starlink համակարգն օգտագործել Ռուսաստանի տարածքում՝ բալիստիկ հրթիռների արձակման կայանքներին հարվածներ հասցնելու համար։

Օգոստոսի 7-ին The Atlantic-ը հայտնել էր, որ Մասկը մինչ այժմ հրաժարվել է Ուկրաինային թույլ տալ  ռուսական տարածքում Starlink-ն օգտագործելու հնարավորությունից։ Լրատվամիջոցները հայտնում են նաև, որ Միխայիլ Ֆեդորովը պաշտպանության նախարարի պաշտոնից ազատվելուց հետո ոչ պաշտոնական ուղիներով փորձում է դիմել Մասկին, որը դեռևս  հրաժարվում է զիջումների գնալ։

Ձմռանը Իլոն Մասկն արձագանքել էր այն ժամանակվա պաշտպանության նախարար Ֆեդորովի խնդրանքին՝ օգնելու լուծել ռուսական հարվածային ԱԹՍ-ների վրա Starlink-ի օգտագործման խնդիրը։ Փետրվարի 5-ին ռուսական ուժերի կողմից օգտագործվող Starlink-ի տերմինալները զանգվածաբար դադարել էին աշխատել։

2025 թվականի մարտին Մասկը հայտարարել էր, որ երբեք չի անջատի Starlink ցանցն ուկրաինացի զինվորականների համար, նույնիսկ եթե համաձայն չէ Ուկրաինայի քաղաքականության հետ։ Մասկն այդ մասին հայտարարել էր այն բանից հետո, երբ նշել էր, որ Starlink-ն անջատելու դեպքում ուկրաինական ճակատը կփլուզվի։

Ազատության շքանշանը Ուկրաինայի պետական բարձրագույն պարգևներից մեկն է։ Դրանից բարձր են միայն «Ուկրաինայի հերոս» կոչումը և լայնածավալ պատերազմի սկսվելուց հետո սահմանված «Մարտական արժանիքների խաչը»։