Անտեղի սահմանափակումները չեն համապատասխանում Հայաստան-Ռուսաստան հարաբերությունների ոգուն. Ռուբինյան. ՏԵՍԱՆՅՈՒԹ

Հայկական տնտեսվարողների նկատմամբ կիրառվող անարդարացի և անտեղի սահմանափակումները չեն համապատասխանում ո՛չ Հայաստան-Ռուսաստան հարաբերությունների ոգուն, ո՛չ էլ Եվրասիական տնտեսական միության կանոններին։ Այս մասին Ազգային ժողովում լրագրողների հետ զրույցում հայտարարեց ԱԺ նախագահ Ռուբեն Ռուբինյանը։

Անդրադառնալով ՌԴ Պետդումայի նախագահ Վյաչեսլավ Վոլոդինի հայտարարություններին, թե Հայաստանն իբրև «ցինիկաբար օգտվում է ԵԱՏՄ-ից՝ միաժամանակ քայլեր անելով դեպի ԵՄ», Ռուբինյանը շեշտեց, որ հայկական կողմը ՌԴ-ի հետ հարաբերություններում եղել և մնում է չափազանց անկեղծ։

«Մենք չէ, որ որևէ բան ենք անում ՌԴ-ի հետ հարաբերությունները վատթարացնելու համար։

Ըընդհակառակը, մենք ամեն ինչ արել ենք և շարունակում ենք անել նորմալ, բարիդրացիական, բարեկամական հարաբերություններ ունենալու համար»,- ասաց Ռուբինյանը։

Լրագրողի հարցին, թե երբ կարող է տեղի ունենալ ԵՄ անդամակցության հարցով հանրաքվեն, Ռուբինյանն ասաց․ «ԵՄ անդամակցության հարցով հանրաքվե անցկացնելը հնարավոր է միայն այն բանից հետո, երբ հարցը ձևակերպված լինի և դրանից բխող հանգամանքները հայտնի լինեն։ Չի կարելի ուղղակի հանրաքվե անել առանց հստակության։ Միայն այն բանից հետո, երբ մենք կդիմենք ԵՄ անդամակցության համար, կստանանք համապատասխան դրական արձագանք, քայլերի ու ժամկետների հստակություն, այդ ժամանակ հնարավոր կլինի հանրաքվե իրականացնել»։

Մանրամասները՝ տեսանյութում։

Անի Թամրազյան