Ծառուկյանը խոսում էր իր առյուծի մասին, մեկ էլ հոպ՝ առյուծը սատկեց, Ծառուկյանը հայտնվեց բանտում․ ՏԵՍԱՆՅՈՒԹ

ԱԺ «Հայաստան» խմբակցության պատգամավոր Արթուր Խաչատրյանը խորհրդարանի ամբիոնից իշխանություններին մեղադրեց իրավապահ համակարգը քաղաքական հետապնդումների և «վենդետաների» գործիք դարձնելու մեջ՝ նշելով, որ Փաշինյանի իշխանության օրոք ցանկացած քաղաքական հայտարարության կամ գործողության «պատահականորեն» հաջորդում են քրեական գործերն ու ձերբակալությունները։

Ազգային ժողովում Կառավարության ծրագրի քննարկման ժամանակ Խաչատրյանն անդրադարձավ իշխանության գործելաոճին, դատական համակարգի նկատմամբ քաղաքական ճնշումներին և ընդդիմադիրների նկատմամբ հարուցվող գործերին։

Խաչատրյանը հեգնանքով թվարկեց մի շարք դեպքեր, երբ քաղաքական կամ հասարակական գործիչների քննադատական քայլերից անմիջապես հետո նրանց նկատմամբ սկսվել են հետապնդումներ․

«Վեհափառ Հայրապետը մասնակցում է շվեյցարական խաղաղության նախաձեռնության հանդիպմանը, մի քանի օր հետո պատահական սկսվում է հակաեկեղեցական արշավը։ Պատահական Սամվել Կարապետյանը խոսում է եկեղեցին պաշտպանելու մասին, մեկ էլ՝ ինչում ասես չմեղադրեցին։ Գագիկ Ծառուկյանը մտնում է քաղաքականություն, խոսում է իր առյուծի մասին, մեկ էլ հոպ՝ առյուծը սատկեց, Գագիկ Ծառուկյանը հայտնվեց բանտում։ 2018-ին Փաշինյանն ասում էր՝ Ծառուկյանը խոշոր սեփականատեր է, հետո ասում է՝ օլիգարխ է։ Այսինքն՝ Ձե՞ր օրոք ծնվեցին օլիգարխներ»,- դիմելով վարչապետ Փաշինյանին ասաց Խաչատրյանը։

Պատգամավորը քննադատեց Ռոբերտ Քոչարյանի դեմ հնչող մեղադրանքների շահարկումները՝ նշելով․ «Ինչ մեղադրանքներ ասես Ռոբերտ Քոչարյանին չեն ներկայացրել՝ սկսած Եռաբլուրը սեփականաշնորհելուց։ Եռաբլուրն ո՞ւր, «Տոյոտա Երևանն» ո՞ւր․ հլը աշխարհագրորեն նայե՛ք։ Բայց հնչեղություն է, չէ՞՝ Եռաբլո՛ւր, «Տոյոտա Երևա՛ն»… Մարտի 1-ի և Հոկտեմբերի 27-ի գործերը տարիներով չեք բացահայտում, որպեսզի դարձնեք քաղաքական շահարկումների առարկա»։

Մանրամասները՝ տեսանյութում։

Անի Թամրազյան