Դուք կատարելագործվելու տեղ չունեք, ոնց չունի «Ժիգուլին»․ Կոնջորյանը՝ ընդդիմությանը․ ՏԵՍԱՆՅՈՒԹ

ԱԺ փոխնախագահ Հայկ Կոնջորյանը խորհրդարանի ամբիոնից դիմելով ընդդիմության՝ ընդգծեց, որ նրանք իրենց համարում են ի սկզբանե «կատարյալ» և անընդունակ են ինքնահայեցման ու զարգացման, ինչպես «Ժիգուլի» մակնիշի ավտոմեքենան։

«Մեզ ասում են՝ դուք 7 տարի մնացել եք նույն դասարանում։ Հնարավոր չէ, որ մարդը սովորի մի բան, ինչն իր կարծիքով ինքն արդեն գիտի։ Սա հենց մեր ընդդիմության մասին է։ Մենք կարող ենք 7 տարի մնալ նույն դասարանում, բայց հետո փոխադրվել 8-րդ դասարան։ Իսկ դուք մշտապես առաջին դասարանում եք, որովհետև դուք ի սկզբանե «կատարյալ» եք։

Դուք կատարելագործվելու տեղ չունեք, ոնց որ կատարելագործվելու տեղ չունի «Ժիգուլին»։ «Ժիգուլին» չունի կատարելագործվելու տեղ, իսկ «Մերսեդեսն» ունի։ Դուք չունեք ինքնահայեցման, սեփական սխալներն ընդունելու քաղաքականություն, որը մեզ այսօր հնարավորություն է տվել Հայաստանը հանել գոյատևման ճգնաժամերից և դնել զարգացման ռելսերի վրա»,- ասաց Կոնջորյանը։ 

Հայկ Կոնջորյանը հայտարարեց, որ Կառավարության  ծրագիրն իր բնույթով առաջինն է, որը գրված է խաղաղության պայմաններում և երկիրը գոյաբանական ճգնաժամերի օրակարգից տանում է դեպի զարգացման օրակարգ։

«Մենք դուրս ենք գալիս գոյաբանական սպառնալիքների օրակարգից դեպի զարգացման օրակարգ։ Մեր ընդդիմությունը միշտ պատկերացրել է, որ մեր ժողովուրդը պետք է անընդհատ լինի գոյաբանական կռվի մեջ, և մեր նավը մշտապես պետք է փոթորկոտ ծովում լինի։ Հիմա կինոթատրոններում Նոլանի «Օդիսևսն» է, չէ՞․ որ մենք պետք է Ոդիսևսի պես անընդհատ օտար ափերում մոլորված լինենք, կռիվ տանք կիկլոպների հետ, որ չհասնենք մեր Իթակեին՝ մեր երազանքների Հայաստանին, որին մենք այսօր հասնում ենք, հասել ենք»,- շեշտեց ԱԺ փոխնախագահը։

Մանրամսները՝ տեսանյութում։

Անի Թամրազյան