ՌԴ-ն հարվածել է Զապորոժիեին, Կիևին և Խարկովին․ զոհեր կան

Ռուսաստանն անօդաչու թռչող սարքերով, հրթիռներով և ավիառումբերով հարվածներ է հասցրել Ուկրաինայի մի քանի քաղաքների։ Զապորոժիեում և Խարկովում զոհեր կան, հայտնել են տեղական իշխանությունները, գրում է DW-ի ռուսական ծառայությունը։

Զապորոժիեի տարածաշրջանային ռազմական վարչակազմի ղեկավար Իվան Ֆյոդորովի խոսքով՝ վաղ առավոտյան Զապորոժիեում 2 մարդ է զոհվել կառավարվող ավիառումբերի հարվածի հետևանքով։ Հարձակման հետևանքով վնասվել է նաև ճանապարհ, հրդեհ է առաջացել բաց տարածքում։ Ֆյոդորովի խոսքով՝ օգոստոսի 24-ի երեկոյան անօդաչու թռչող սարքերի հարվածներից վնասվել է բնակելի շենք, բնակարաններից մեկում հրդեհ է բռնկվել։

Քաղաքապետ Իգոր Տերեխովը հայտարարել է, որ Խարկովի հարավում գտնվող Օսնովյանսկի շրջանի արդյունաբերական գոտում հրթիռային հարձակման հետևանքով զոհվել է ևս մեկ մարդ։ Նա նաև հայտնել է Խարկովի Կիևսկի շրջանում անօդաչու թռչող սարքերի հարվածների մասին։

Կիևի Գոլոսիևսկի շրջանում անօդաչուի անկման հետևանքով վնասվել են 16 հարկանի բնակելի շենքի պատերը, կոտրվել են պատուհանները, հայտնել է քաղաքապետ Վիտալի Կլիչկոն։ Մեկ կին վիրավորվել է։

Դնեպրում, ուկրաինական լրատվամիջոցների նախնական հաղորդագրությունների համաձայն, հարվածներ են հասցվել խոշոր «Կարավան» առևտրի կենտրոնի մերձակայքին, հրդեհ է բռնկվել։ Ռուսական կողմը հարձակվել է նաև Չեռնիգովի մարզի Կորյուկովսկի շրջանում գտնվող ձեռնարկության վրա։ Հրդեհ է բռնկել ավելի քան 3000 քառակուսի մետր տարածքում, հայտնել է Ուկրաինայի արտակարգ իրավիճակների պետական ​​ծառայությունը։ Հրդեհներ են գրանցվել նաև ճանապարհային և անտառային օբյեկտներում, ինչպես նաև մասնավոր բիզնեսներում, դրանք մարվել են։  Տուժածների մասին չի նշվում։

Ուկրաինայի պետական ​​սահմանային ծառայությունը հայտնել է Մոլդովայի հետ սահմանին գտնվող անցակետի վրա նոր հարձակման մասին: «Շահեդ» անօդաչու թռչող սարքերը հարվածել են «Վինոգրադովկա» տրանսպորտային անցակետին՝ այն հրդեհելով և անգործունակ դարձնելով:

Բացի այդ, օգոստոսի 24-ի երեկոյան Կարմիր խաչի մամուլի ծառայությունը հայտնել է, որ ռուսական անօդաչու թռչող սարքերը հարձակվել են կազմակերպության՝ Խերսոնում գտնվող պահեստի վրա: Հարվածները և հրդեհը ոչնչացրել են շուրջ 28 միլիոն գրիվնա արժողությամբ մարդասիրական պարագաներ: Պահեստում պահվում էին աշուն-ձմեռ սեզոնի համար անհրաժեշտ պարագաներ, ինչպես նաև բժշկական, հիգիենայի պարագաներ, վերմակներ, ջրի և էլեկտրաէներգիայի սարքավորումներ, այլ մարդասիրական օգնություն:

Ուկրաինայի ռազմաօդային ուժերը հայտարարել են, որ օգոստոսի լույս 25-ի գիշերը ռուսական զորքերը հարձակվել են Ուկրաինայի վրա «Իսկանդեր-Մ» բալիստիկ հրթիռով, X-31P օդային ուղղորդվող հրթիռով և 150 «Շահեդ» դասի հարձակողական անօդաչու թռչող սարքերով։ Ուկրաինայի հակաօդային պաշտպանությունը երկրի հյուսիսում, հարավում և արևելքում խոցել կամ ճնշել է 124 ռուսական «Շահեդ», «Գերբերա» և այլ անօդաչու թռչող սարքեր։ Օդային հարձակման միջոցների հարվածներ են գրանցվել 17 վայրերում, իսկ բեկորներն ընկել են յոթ վայրերում։

Թարգմանությունը՝ Էմմա Չոբանյանի