Ինչո՞ւ մենակ մնացինք թշնամու հետ, այդ հարցը գուցե Ձե՞զ տաք․ Գալստյանը՝ Փաշինյանին․ ՏԵՍԱՆՅՈՒԹ

ԱԺ «Հայաստան» խմբակցության պատգամավոր Լիլիթ Գալստյանը խորհրդարանի ամբիոնից քննադատեց իշխանությունների վարած արտաքին ու ներքին քաղաքականությունը՝ կարծիք հայտնելով, թե հայ ժողովուրդը ոչ մանկուրտ է, ոչ էլ Կենտրոնական Ասիայի անապատներից սերած քոչվոր, որ հրաժարվի իր պատմական հիշողությունից ու հազարամյա հայրենիքից։

«Դուք ասում եք՝ դադարե՛ք Հայաստան փնտրել։ Հակագիտական, հակապետական և հակաազգային այս միտքը երեկ այս ամբիոնից հնչեց։ Բայց մենք ո՛չ ինքնություն և քաղաքակրթական ժառանգություն չունեցող մանկուրտ չենք, ո՛չ էլ Կենտրոնական Ասիայի անապատից սերող քոչվոր խաշնարած, որ հիշողություն չունենանք։ Մերը մերն է՝ մեր հազարամյակների հայրենիքը»,- ասաց Գալստյանը։

Անդրադառնալով «Իրական Հայաստանի» հայեցակարգին և արտաքին ճակատում Հայաստանի մենակ մնալու պատճառներին՝ Լիլիթ Գալստյանն հարցրեց․ ««Ինչո՞ւ մենակ մնացինք թշնամու դեմ»՝ երեկ այս հարցն էլ հնչեց։ Այդ հարցը գուցե Ձե՞զ տաք և խոստովանեք, որ պատճառը Ձեր սեփական «զրո կետն» է, անհավասարակշիռ արտաքին քաղաքականությունը, Ձեր ոչ պրոֆեսիոնալիզմը, ներազգային պառակտումը և այսօր էլ շարունակվող վրեժի ծարավը»։

Ընդդիմադիր պատգամավորի խոսքով՝ իշխանության միակ հակազդեցությունը 29․740 քառ/կմ տարածքի անընդհատ կրկնությունն է, մինչդեռ, պնդեց, որ թվերն ու քարտեզները երաշխիք չեն, երբ այս պահին էլ Ադրբեջանի օկուպացիայի տակ է գտնվում Հայաստանի ինքնիշխան տարածքից ավելի քան 200 քառ/կմ։

Մանրամասները՝ տեսանյութում։

Անի Թամրազյան