Քաղաքականություն
24.08.2026 | 21:14
ՀՀ կառավարությունը ներկայացրել է 2026-2031 թվականների գործունեության ակնկալվող ուղենշային արդյունքները։ Փաստաթղթում ներառված են անվտանգության, տնտեսության, սոցիալական ոլորտի, ենթակառուցվածքների, կրթության, տեխնոլոգիաների և կառավարման վերաբերյալ մի շարք թիրախներ։
Անվտանգություն և արտաքին քաղաքականություն
Հայաստանի և Ադրբեջանի միջև հաստատված խաղաղության ամրապնդում և ինստիտուցիոնալացում։
Հայաստանի շուրջ բարենպաստ անվտանգային միջավայրի պահպանում և զարգացում։
Հայաստանի ապաշրջափակում՝ «Խաղաղության խաչմերուկ» ծրագրի և TRIPP նախագծի հիման վրա։
ՀՀ քաղաքացիների համար ԵՄ մուտքի վիզաների ազատականացում։
Տնտեսություն և աշխատատեղեր
Տարեկան միջինում 6% տնտեսական աճ։
125 հազար նոր աշխատատեղի ստեղծում։
Հայաստանյան ծագման ապրանքների արտահանման առնվազն կրկնապատկում։
Կորպորատիվ պարտատոմսերի շուկայի ծավալի առնվազն 3-անգամյա աճ։
Արդյունաբերական արտադրանքի թողարկման 50% աճ՝ 2025 թվականի 3.3 տրիլիոն դրամից հասցնելով 5 տրիլիոն դրամի։
Գյուղատնտեսության համախառն արտադրանքի արժեքի առնվազն 50% աճ, իսկ հացահատիկի արտադրության՝ կրկնապատկում։
Ջրային ռեսուրսներ և ենթակառուցվածքներ
10 ջրամբարի կառուցման մեկնարկ՝ 2033 թվականին ավարտելու նպատակով։
350 կմ ջրանցքների և խողովակաշարերի կառուցում և վերակառուցում։
Նոր 10 հազար հա հողերի ոռոգման ապահովում։
Երևանում, Գյումրիում և Վանաձորում առնվազն 24-ժամյա ջրամատակարարում։
2,500 կմ ավտոճանապարհի և 40 կամրջի կառուցում և/կամ նորոգում։
Կրթություն
Կառավարությունը նախատեսում է կառուցել, վերակառուցել կամ հիմնանորոգել և ամբողջական գույքով հագեցնել՝
300 դպրոց,
30 քոլեջ,
100 արտադպրոցական հաստատություն,
100 մանկապարտեզ,
100 համակցված խաղահրապարակ՝ ներառյալ համայնքային լողավազաններ։
Նախատեսվում է նաև Ակադեմիական քաղաքի տեխնոլոգիական կլաստերի և 3,600 ուսանողի համար նախատեսված կացարանների կառուցում։
Տեխնոլոգիաներ և արհեստական բանականություն
Կառավարությունը նախատեսում է ձևավորել առաջատար դասի արհեստական բանականության հաշվարկային առնվազն 100 հազար GPU-ի համարժեք հզորություն։
Նպատակ է դրվում այդ հաշվարկային ռեսուրսի առնվազն 10%-ը հասանելի դարձնել Հայաստանի գիտահետազոտական, կրթական, ստարտափային, արդյունաբերական և հանրային հատվածներին։
Տիեզերական կարողություններ
Նախատեսվում է Հայաստանի տիեզերական կարողությունների զարգացում՝ երկրի դիտարկման առնվազն 2 և հեռահաղորդակցման 1 արբանյակի ձեռքբերման ու շահագործման, ինչպես նաև ազգային վերգետնյա ենթակառուցվածքի և արբանյակների կառավարման ու տվյալների մշակման կարողությունների ձևավորման միջոցով։
Էներգետիկա
Նախատեսվում է գործարկել՝
1,000 ՄՎտ ֆոտովոլտային,
800 ՄՎտ կուտակիչ էլեկտրակայաններ։
Սոցիալական ոլորտ և կառավարում
Ամբողջ բնակչության ներառում առողջության ապահովագրության համակարգում։
Աղքատության կրճատում 5 տոկոսային կետով։
Պետական և համայնքային հիմնական ծառայությունների թվայնացում։
Ժողովրդավարական, հակակոռուպցիոն, տնտեսական և հանրային կառավարման բարեփոխումների խորացում։
Ապօրինի ակտիվների վերադարձ
Կառավարությունը նախատեսում է շարունակել ապօրինի, այդ թվում՝ կոռուպցիոն եղանակով ստացված ակտիվների վերադարձի գործընթացը։
Այն ներառելու է նաև ապօրինի սեփականաշնորհված կամ վարձակալության վերցված անտառների, լողափերի, զբոսայգիների, պուրակների, կրթական հաստատությունների և այլ հանրային տարածքների վերադարձը պետությանը և համայնքներին։
Փաստաթղթում որպես թիրախ նշվում է հանրությանը շուրջ 2 միլիարդ դոլարին համարժեք ապօրինի ծագում ունեցող անշարժ և շարժական գույքի վերադարձը։
