Ադրբեջանը պետք է վերադարձնի Հայաստանի հողերը. Նարեկ Կարապետյան․ ՏԵՍԱՆՅՈՒԹ

«Կարող ենք դոկումենտալ նայել, թե այս Կառավարությունը քանի պատերազմ է բերել։ Այսինքն՝ երեք մեծ պատերազմ է բերել։ Եռապատերազմի կուսակցություն է «Քաղաքացիական պայմանագիր» կուսակցությունը»,- ճեպազրույցում հայտարարեց «Ուժեղ Հայաստան» խմբակցության ղեկավար Նարեկ Կարապետյանը:

Նա նշեց, որ իրենք շարունակելու են բարձրաձայնել Հայաստանի տարածքների և Ադրբեջանի հետ սահմանազատման հարցերը։

«Որտե՞ղ են մեր այն հողերը, որ դելիմիտացիայով պետք է հետ տրվեր։ Իրենց տվեցին հողեր, չէ՞, գյուղեր տվեցին, տարածքներ տվեցին։ Որտե՞ղ են մեր հողերը, նույն տարածքի շարունակությունն է, ինչո՞ւ չի վերադարձվել մեզ»,- ասաց պատգամավորը։

Նրա խոսքով՝ իշխանությունը խաղաղության գործընթացը ներկայացնում է որպես խնդիրների լուծում, մինչդեռ Ադրբեջանի նախագահ Իլհամ Ալիևի հայտարարությունները, ըստ նրա, այլ բովանդակություն ունեն։

Անկլավների վերաբերյալ հարցին, թե իշխանափոխության դեպքում «Ուժեղ Հայաստանը» ինչ դիրքորոշում կունենա Ադրբեջանի հետ բանակցություններում՝ փոխանակման տարբերակի՞ն է կողմ, թե՞ այլ լուծման, Կարապետյանը պատասխանեց, որ նախ Ադրբեջանը պետք է վերադարձնի, իր ձևակերպմամբ, Հայաստանի տարածքներին վերաբերող այն հողերը, որոնք սահմանազատման արդյունքում պետք է գտնվեն Հայաստանի վերահսկողության ներքո։

«Դրանից հետո մենք կհասկանանք՝ այդ երկիրը երկարաժամկետ խաղաղության է նայում, թե ուղղակի հիբրիդային ճնշման եղանակով բոլոր տեղերով ճնշում է մեզ»,– ասաց ընդդիմադիր պատգամավորը:

Մանրամասները` տեսանյութում:

Արփի Հակոբյան