16.09.2026 | 09:30
Համաշխարհային օլիմպիադա. Շախմատի Հայաստանի թիմերի առաջին մրցակիցները և կազմերը
Ռուսաստանը ծովով բենզինի առաջին խմբաքանակը կստանա Թուրքիայից
Քաղաքականություն
24.08.2026 | 17:48
Ռուսաստանը պատրաստվում է ծովով Թուրքիայից ստանալ բենզինի առաջին խմբաքանակը՝ ավելացնելով նոր մատակարարման ուղի, քանի որ Մոսկվան պայքարում է վառելիքի աճող պակասի դեմ։ S&P Global Commodities-ը հայտնել է, որ Wendrix լցանավը, որը բեռնվել է Մերսինի նավահանգստում, տեղափոխում է 200,000 բարել բենզին և, ինչպես սպասվում է, Ռուսաստան կհասնի հաջորդ շաբաթ, գրում է Turkiye today-ը։
Լցանավի բեռնաթափման նավահանգիստը հայտնի չէ, բայց նավն օգոստոսի 21-ի ուշ կեսօրին անցել է Լատվիայի մոտ Բալթիկ ծովով՝ Կալինինգրադն անցնելուց հետո, որտեղ գտնվում է Բալթիկ ծովում Ռուսաստանի չորս նավահանգիստներից մեկը։
Kpler նավերի հետևման ծառայության տվյալների համաձայն՝ Ռուսաստանը վերջին մեկ ամսվա ընթացքում Հնդկաստանի Վադինար տերմինալում ստացել է երեք բեռնված նավ՝ Եգիպտոսի մոտակայքում գտնվող նավից նավ փոխադրումների միջոցով, իսկ հուլիսի վերջին Մարոկկոյից ժամանել է առանձին բեռ։
Հնդկաստանից երեք խմբաքանակով մատակարարվել է, համապատասխանաբար, 356 հազար, 325 հազար և 325 հազար բարել բենզին, իսկ Մարոկկոյից՝ 300 հազար բարել։ Հաղորդագրության համաձայն, ընդհանուր առմամբ, ծովային ճանապարհով Ռուսաստանի բենզինի ներմուծումը հուլիսի վերջից ի վեր գերազանցել է 1 միլիոն բարելը։
Ռուսաստանը, որը պատմականորեն աշխարհում ավտոմոբիլային վառելիքի խոշորագույն արտահանողներից է, հուլիսին սկսել է բենզին ներմուծել ծովային ճանապարհով՝ այն բանից հետո, երբ ուկրաինական հարվածները վնասել են երկրի էներգետիկ ենթակառուցվածքները։ S&P Global Energy CERA-ի վերլուծաբանների տվյալներով՝ հուլիսին Ռուսաստանում նավթավերամշակման գործարանների հումքի վերամշակման միջին ծավալը կազմել է օրական 3,7 միլիոն բարել, ինչը 2025 թվականի միջին ցուցանիշից 28%-ով պակաս է։
Խափանումների հետևանքները տարածվել են նաև մանրածախ շուկա․ օգոստոսին ՌԴ առնվազն 10 շրջան կրկին վառելիքի վաճառքի սահմանափակումներ է մտցրել՝ այն բանից հետո, երբ հուլիսի վերջին վառելիքի պակասը կարճ ժամանակով մեղմվել էր։
Մոսկվայի բենզալցակայաններում նույնպես կրկին սահմանափակվել է գնվող վառելիքի քանակը, իսկ Սանկտ Պետերբուրգի միջազգային ապրանքահումքային բորսայում բենզինի վաճառքի ծավալներն օգոստոսի սկզբից նվազել են շուրջ 20%-ով։
Մոսկվան մինչև 2027 թվականի հունվարի վերջ արգելել է բենզինի արտահանումը և սկսել է արտերկրից վառելիք ներմուծել, այդ թվում՝ բենզին Հնդկաստանից, ինչպես նաև մատակարարումներ ստանալ հարևան Բելառուսից և Ղազախստանից։ Օգոստոսին Ռուսաստանի նավթավերամշակման գործարանները 17 անգամ ենթարկվել են հարվածների։
Թարգմանությունը՝ Էմմա Չոբանյանի
