04.11.2026 | 23:13
Ընդդիմադիրները հավաքվել են քննարկման Սամվել Կարապետյանի տանը. ՏԵՍԱՆՅՈՒԹ
Վրաստանի նախկին վարչապետ Իրակլի Ղարիբաշվիլիին նոր մեղադրանք է առաջադրվել
Քաղաքականություն
24.08.2026 | 13:41
Վրաստանի նախկին վարչապետ Իրակլի Ղարիբաշվիլիին, որն անցյալ շաբաթ հայտարարել էր իշխող «Վրացական երազանք» կուսակցության կողմից ճնշումների մասին, կոռուպցիայի մեղադրանք է առաջադրվել, գրում է Sova news-ը։
Խոսքը «մի խումբ անձանց կողմից նախնական դավադրության միջոցով առանձնապես խոշոր չափի կաշառք ստանալու» մասին է։
Վրաստանի գլխավոր դատախազի տեղակալ Ամիրան Գուլուաշվիլին հայտարարել է, որ նոր գործով ցուցմունք է տվել պաշտպանության նախկին նախարար Ջուանշեր Բուրչուլաձեն, որը ձերբակալված է։ Բացի այդ, հուլիսին Բուրչուլաձեի աներորդին՝ Վասիլ Մխեիձեն, դիմել է Դատախազություն՝ հետաքննության հետ համագործակցելու նպատակով և քննիչներին տրամադրել է «ամբողջական տեղեկատվությունը»։
Քննության տվյալներով՝ խոսքը ՊՆ-ի կողմից բժշկական սարքավորումների գնման գործընթացում ուռճացված գների, ինչպես նաև Վրաստանի այն ժամանակվա վարչապետ Ղարիբաշվիլիի կողմից հովանավորչության դիմաց 750,000 լարի կաշառք ստանալու մասին է։
Ղարիբաշվիլիին մեղադրանք է առաջադրվել պաշտոնեական դիրքի չարաշահմամբ առանձնապես խոշոր չափերի կաշառք ստանալու համար։ Նրան սպառնում է 10-ից 15 տարվա ազատազրկում։
2026 թվականի հունվարին Վրաստանի դատախազությունը նախկին վարչապետի հետ կնքել է դատավարական համաձայնություն։ Քննության վարկածի համաձայն՝ 2019-2024 թվականներին նա զբաղվել է ապօրինի ձեռնարկատիրական գործունեությամբ և եկամուտների հայտարարագրերում կեղծ տեղեկություններ է ներկայացրել։ Դատարանը նրան մեղավոր էր ճանաչել և դատապարտել հինգ տարվա ազատազրկման։
Իրակլի Ղարիբաշվիլին Վրաստանի վարչապետն է եղել 2013-2015 և 2021-2024 թվականներին։
Թարգմանությունը՝ Էմմա Չոբանյանի
