05.11.2026 | 00:08
Ինչ է որոշել ընդդիմությունը. Նարեկ Կարապետյանը հանդիպումից հետո մանրամասներ հայտնեց. ՏԵՍԱՆՅՈՒԹ
Ուկրաինայի անկախության օրը ԵՄ-ն հետագա աջակցություն է խոստացել
Քաղաքականություն
24.08.2026 | 11:30
Եվրամիությունը խոստացել է շարունակել աջակցությունը Կիևին «այնքան ժամանակ, որքան պահանջվում է»։ Այս մասին ասվում է Եվրոպական խորհրդի նախագահ Անտոնիո Կոշտայի հայտարարության մեջ, որը հրապարակվել է Ուկրաինայի Անկախության օրվա կապակցությամբ, գրում է DW-ի ռուսական ծառայությունը։
«Մենք կշարունակենք տրամադրել այնքան աջակցություն, որքան անհրաժեշտ է, և այնքան ժամանակ, որքան կպահանջվի՝ պատերազմի ժամանակ, խաղաղության բանակցությունների ժամանակ և վերակառուցման ընթացքում»,- նշել է նա։
Ըստ Կոշտայի՝ Եվրամիության տեսլականը չի սահմանափակվում միայն պատերազմի ժամանակաշրջանով․ «Ուկրաինայի ապագան Եվրամիության կազմում անվտանգության և երկարաժամկետ ժողովրդավարական կայունության լավագույն երաշխիքն է՝ թե՛ Ուկրաինայի, թե՛ ամբողջ Եվրոպայի համար»։
Նրա խոսքով՝ Եվրամիությունը պատրաստ է շարունակել Ռուսաստանի նկատմամբ պատժամիջոցների ճնշումը։
«Մենք կմեծացնենք ճնշումը՝ մինչև Ռուսաստանը դադարեցնի սպանությունները, ցուցաբերի խաղաղության նկատմամբ անկեղծ նվիրվածություն և մարտադաշտից անցնի բանակցությունների սեղանի»,- նշել է Կոշտան։
ԵՄ Խորհրդի նախագահն անձամբ կմասնակցի «Կամավորների կոալիցիայի» հանդիպմանը Կիևում՝ օգոստոսի 24-ին։
Ուկրաինայի մայրաքաղաք են ժամանելու մի շարք համաշխարհային առաջնորդներ, այդ թվում՝ Մեծ Բրիտանիայի վարչապետ Էնդի Բըրնհեմը։ Սա նրա առաջին արտասահմանյան այցը կլինի պաշտոնը ստանձնելուց հետո։
Բըրնհեմը համանախագահելու է «Կամավորների կոալիցիայի» հանդիպումը, նախատեսվում է նաև նրա առանձին հանդիպումը Ուկրաինայի նախագահ Վլադիմիր Զելենսկիի հետ։ Ուկրաինական լրատվամիջոցների հաղորդմամբ՝ Էնդի Բըրնհեմն արդեն ժամանել է Կիև։
«Կամավորների կոալիցիայի» նիստին կմասնակցեն նաև այլ համաշխարհային առաջնորդներ, այդ թվում՝ Գերմանիայի կանցլեր Ֆրիդրիխ Մերցը և Ֆրանսիայի նախագահ Էմանուել Մակրոնը, Սկանդինավյան և Բալթյան երկրների առաջնորդները։ Ոմանք անձամբ կմասնակցեն, իսկ մյուսները՝ տեսակոնֆերանսի միջոցով։
Ուկրաինայի ԱԳ նախարար Անդրեյ Սիբիհան այսօր առավոտյան Կիևի երկաթուղային կայարանում դիմավորել է օտարերկրյա հյուրերին։ Ժամանել են Եվրոպական խորհրդի նախագահ Անտոնիո Կոշտան, Լյուքսեմբուրգի վարչապետ Լյուկ Ֆրիդենը, Մոլդովայի նախագահ Մայա Սանդուն և Էստոնիայի նախագահ Ալար Կարիսը։
Թարգմանությունը՝ Էմմա Չոբանյանի
