Սա պատերազմ է Հայաստանի պետականության դեմ․ Փաշինյանը՝ իր և ԱԱԾ տնօրենի գաղտնալսված հեռախոսազրույցի մասին. ՏԵՍԱՆՅՈՒԹ

Վարչապետի պաշտոնակատար Նիկոլ Փաշինյանը քիչ առաջ ֆեյսբուքյան ուղիղ եթերում անդրադարձավ իր և ԱԱԾ տնօրեն Արթուր Վանեսյանի հեռախոսազրույցի գաղտալսման հրապարակմանը:

«Ինչո՞ւ է դա արվում, որովհետև կոռումպացած համակարգը տեսնում է, որ իր շուրջ օղակը սեղմվում է, որ այն, ինչ մենք խոստացել էինք, քայլ առ քայլ իրականություն է դառնալու խորհրդարանական ընտրություններից հետո, և որևէ մեկը չի պլստալու, և բոլոր կոռումպացվածներին մենք կանչելու ենք պատասխանատվության՝ ժողովրդի անունից և ժողովրդի մանդատով»,- նշեց նա:

Փաշինյանը գաղտալսումների հրապարակումները համարեց փրկության օղակ գտնելու ջանք. «Ես նախկինում ասել եմ և հիմա էլ շարունակում եմ պնդել. սա պատերազմ է Հայաստանի պետականության դեմ։ Այս հակապետական գործունեությանն արձագանքելու համար անհրաժեշտ է ուղղակի, անկախ եղանակային պայմաններից, եթե նույնիսկ բուք ու բորան լինի, դեկտեմբերի 9-ին գնալ ընտրական տեղամասեր և քվեարկել «Իմ քայլը» դաշինքի օգտին՝ վերցնելով համար 4 քվեաթերթիկը»:

Վարչապետի պաշտոնակատարը նշեց, որ ակնկալում է ժողովրդի քվեն, որպեսզի կարողանան «հակահարված տալ Հայաստանի Հանրապետության դեմ սանձազերծված պատերազմին»: Նա նաև նշեց, որ հրապարակված ձայնագրությունը մոնտաժված է. «Այդ խոսակցությունից հանված են, մասնավորապես, այն դրվագները, երբ ԱԱԾ տնօրենն ասում է, որ դատավորը վախեցած է, ես էլ ասում եմ՝ ի՞նչ է նշանակում՝ դատավորը վախեցած է, Դուք ԱԱԾ ղեկավար եք և դատավորի անվտանգությունն ու անկախությունը պիտի պաշտպանեք: Եթե չեք կարողանում, ուրեմն սխալ եք աշխատում: Ե՛վ ԱԱԾ տնօրենի, և՛ ՀՔԾ պետի խոսակցությունները միանշանակ տեղավորվում են նրանց պաշտոնեական լիազորությունների շրջանակում»:

Նիկոլ Փաշինյանը հայտարարեց՝ սա հակահեղափոխության հերթական դրսևորումն է. «Որևէ կասկած չկա, որ հակահեղափոխությանը սպասվում է ջախջախիչ պարտություն, կոռումպացված համակարգին սպասվում է ջախջախիչ պարտություն, իսկ կոռուպցիոներներին սպասվում են քրեական գործեր, կալանավորումներ, դատավճիռներ և ամբողջ թալանածը պիտի վերադարձնեն ժողովրդին»:

Մանրամասները՝ տեսանյութում