16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Գազայից 3 ծանր հիվանդ երեխա կտեղափոխվի Հայաստան․ պետությունը կհատկացնի 16,7 մլն դրամ
Քաղաքականություն
20.08.2026 | 20:07
Գազայի հատվածից առողջական ծանր խնդիրներ ունեցող 3 երեխա իրենց ծնողների/ուղեկցողների հետ կտեղափոխվի Հայաստան՝ մասնագիտացված բուժօգնություն ստանալու նպատակով: Այս մասին նշված է ՀՀ կառավարության որոշման նախագծում, որով նախատեսվում է Կառավարության պահուստային ֆոնդից Առողջապահության նախարարությանը հատկացնել 16,74 մլն դրամ։
Առողջապահության համաշխարհային կազմակերպության (ԱՀԿ) և ԱԳՆ-ի հետ համատեղ նախապես դիտարկվել էր 11 երեխայի տվյալ, որոնցից ընտրվել էր 7-ը։ Ի վերջո, Հայաստան տեղափոխվելու և առավելագույնը 1 ուղեկցող ունենալու պայմանին համաձայնել են 3 երեխայի ընտանիքները։
Ըստ նախագծի հիմնավորման՝ բուժման ընդհանուր նախահաշիվը կազմելու է 12,5 մլն դրամ։
«Արաբկիր» ԲԿ բուժվելու է մեկ երեխա, որին լյարդի և երիկամի փոխպատվաստում կանեն (ախտորոշումը՝ առաջնային հիպերօքսալուրիա)։ Անհրաժեշտ է դեղորայքային մակարդակի որոշում, բիոպսիա և դիսպանսեր հսկողություն (արժեքը՝ մոտ 1 մլն դրամ)։
Մյուս երկու երեխաները «Նորք-Մարաշ» ԲԿ-ում բուժում կստանան, որոնք ունեն սրտի բնածին ծանր արատներ և վիրահատական կամ ինտերվենցիոն միջամտության կարիք ունեն (արժեքը՝ 3,5 մլն և 8 մլն դրամ)»,- ասված է նախագծի հիմնավորման մեջ։
Նշվում է, որ տարհանման և ճանապարհի ծախսերը կկազմեն մոտ 4,2 մլն դրամ։
Տարհանումն իրականացվելու է Հորդանանով (Իսրայելի և Հորդանանի սահմանին գտնվող «Ալենբի» կամուրջ-անցակետով)՝ որպես առավել ապահով և հարմար երթուղի։
Անցակետից միկրոավտոբուսով նրանք կտեղափոխվեն Ամմանի օդանավակայան, որտեղից էլ կանոնավոր չվերթով՝ Երևան։
Փոխադրման գումարը ներառում է ավիատոմսերը, միկրոավտոբուսի վարձակալությունը, գիշերակացը և գործուղման ծախսերը։
Բուժման և ուղեկցողների կացության բոլոր ծախսերը հոգալու է Հայաստանի Հանրապետությունը, իսկ չծախսված գումարները կվերադարձվեն պետբյուջե։
Անի Թամրազյան
