16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Արփինե Հովհաննիսյանին այսօր են ոստիկանություն հրավիրվել, Արմեն Աշոտյանին՝ վաղը
Հասարակություն
05.12.2018 | 16:50
ՀՀԿ-ից պատգամավորի թեկնածու Արփինե Հովհաննիսյանը դեկտեմբերի 5-ին ոստիկանություն էր հրավիրել: Ֆեյսբուքյան էջում Հովհաննիսյանը գրել է, որ ամեն ինչ նորմալ է. «Ոստիկանություն էի հրավիրվել ինձ ուղղված սպառնալիքի վերաբերյալ տրված հանցագործության մասին հաղորդման առնչությամբ բացատրություն տալու: Ամեն ինչ նորմալ է: Քաղաքական ընթացքը շարունակվում է»:
Ոստիկանության լրատվական ծառայությունից Factor.am-ին ասացին, որ ԱԺ փոխխոսնակին հրավիրել են՝ բացատրություն տալու. «Հովհաննիսյանն ավելի վաղ դիմել էր ոստիկանություն՝ նշելով, որ իրեն համացանցով սպառնալիքներ են հասցրել, այդ իսկ պատճառով այսօր հրավիրվել է ոստիկանություն՝ բացատրություն ներկայացնելու»:
Նշենք, որ դեռևս հոկտեմբերին Արփինե Հովհաննիսյանը դիմել էր ոստիկանություն՝ հայտնելով իրեն ուղղված սպառնալիքների մասին: Նա նաև Ֆեյսբուք սոցցանցի իր էջում գրել էր, որ հետևողական է լինելու նման դրսևորումների հարցում:
«Հայտնում եմ, որ այսուհետ հետևողական եմ լինելու, որպեսզի քաղաքացիաիրավական պատասխանատվության միջոցներ կիրառվեն իմ վերաբերյալ վիրավորական (հայհոյախառն) գրառումներ և մեկնաբանություններ կատարող և տարածող անձանց նկատմամբ։ Ես դիմելու եմ դատարան յուրաքանչյուր մեկնաբանության և գրառման համար՝ հայցեր ներկայացնելով ներառյալ այն սուբյեկտների դեմ, ովքեր չեն հեռացրել կամ շարունակել են հարթակ տրամադրել վիրավորական (հայհոյախառն) գրառումների համար նույնիսկ ծանուցումից հետո»,- գրել էր Արփինե Հովհաննիսյանը:
Հավելենք նաև, որ ոստիկանություն հրավիրվելու մասին ֆեյսբուքում գրել է նաև Արմեն Աշոտյանը. «Դավիթ Շահնազարյանին այսօր հրավիրել էին ԱԱԾ: Արփինե Հովհաննիսյանն այս պահին ոստիկանությունում է: Ես վաղը նույնպես ոստիկանություն եմ հրավիրված: Ընդունում եմ խաղադրույքներ Նիկոլի Փաշինյանի վախեցած և խուճապային հաջորդ քայլերի վերաբերյալ»:
