Քաղաքականություն
20.08.2026 | 13:45ՀՀ կառավարության նիստում վարչապետ Նիկոլ Փաշինյանը ներկայացրեց «Կառավարության կառուցվածքի և գործունեության մասին» օրենքում առաջարկվող փոփոխությունները, որոնցով նախատեսվում է վերանվանել և վերաիմաստավորել երեք գերատեսչությունների գործունեությունը։
ԱԳՆ-ն դառնում է Արտաքին գործերի և միջազգային առևտրի նախարարություն։ Վարչապետի խոսքով՝ Երրորդ հանրապետության տարիներին արտաքին քաղաքականության շուրջ 75-80 տոկոսը կապված է եղել Ղարաբաղյան հակամարտության օրակարգի հետ։
«Այժմ, երբ Հայաստանը թևակոխում է զարգացման նոր փուլ, արտաքին դիվանագիտության, դեսպանությունների և առևտրային կցորդների հիմնական առաքելությունը պետք է դառնա միջազգային տնտեսական հարաբերությունների և առևտրի խթանումը»,- ասաց վարչապետը։
ԲՏԱ-ն դառնում է Բարձր տեխնոլոգիական արդյունաբերության և արհեստական բանականության նախարարություն։ Փաշինյանի խոսքով՝ գերատեսչության կազմում կստեղծվի արհեստական բանականության (ԱԲ) գրասենյակ։
Նա տեղեկացրեց, որ Հայաստանում արդեն գործում է 3 սուպերհամակարգչային կենտրոն, որոնցից 2-ը ԱԲ գործարաններ են։
«Ոլորտի բուռն աճը նաև էներգետիկ մարտահրավերներ է առաջացնում՝ պահանջելով էլեկտրաէներգիայի սպառման պրոգրեսիվ աճի վերահաշվարկ։ Միևնույն ժամանակ, պետական քաղաքականությունը պետք է միտված լինի նրան, որ ԱԲ-ն ոչ թե դուրս մղի մարդուն աշխատաշուկայից, այլ բարձրացնի նրա աշխատանքի արդյունավետությունը»,- ասաց Փաշինյանը։
ԱՍՀՆ-ն դառնում է Աշխատանքի և բարեկեցության նախարարություն։ Վարչապետը նշեց, որ պետք է հաղթահարել խորհրդային այն ընկալումը, թե «աշխատանքը չարչարանք է, իսկ բարեկեցությունը պետք է ապահովի պետությունը»։
«Նոր բանաձևն է՝ «Պետությունը պետք է ուժեղացնի մարդուն, մարդը պետք է ուժեղացնի պետությանը»։ Բարեկեցության ճանապարհը կրթությունն է, որակյալ աշխատանքը, առողջ ապրելակերպն ու արժանապատիվ վաստակը»,- ընդգծեց վարչապետը։
Փաշինյանը շեշտեց, որ կրթությունը պետական համակարգում դառնալու է պարտադիր․ ներդրվող նոր համակարգով կրթությամբ զբաղվող և որակավորում բարձրացնող պաշտոնյաները կստանան հավելավճարներ (բոնուսներ), իսկ ինքնակրթությունից խուսափողների վարձատրությունը կնվազի։
Մանրամասները՝ տեսանյութում։
Անի Թամրազյան
