Քաղաքականություն
20.08.2026 | 11:55Ազգային ժողովի Եվրոպական ինտեգրման հարցերի մշտական հանձնաժողովի նախագահի թեկնածու Արեգա Հովսեփյանը լրագրողների հետ զրույցում անդրադարձավ հանձնաժողովի նախագահի պաշտոնում իր ընտրվելու հնարավորություններին, ԱԳՆ-ից իր հեռանալու հանգամանքներին, ինչպես նաև Հայաստանի արտաքին քաղաքական ու տնտեսական կողմնորոշումներին:
Հանձնաժողովի նախագահի ընտրության և խորհրդարանական գործունեության մասին Հովսեփյանը հայտնեց, որ նախորդ օրվա քննարկումներից հետո հույս ունի, որ չի ընտրվի հանձնաժողովի նախագահ, քանի որ «Քաղաքացիական պայմանագիր» խմբակցության պատգամավորների հարցադրումները հիմնականում չեն վերաբերել եվրաինտեգրմանը։ Այնուամենայնիվ, պատգամավորն ընդգծեց, որ պատրաստ է աշխատել ցանկացած կարգավիճակում. «Մենք եկել ենք Ազգային ժողով աշխատելու՝ անկախ նրանից, թե հանձնաժողովում ինչ կարգավիճակում կլինենք, շարունակելու ենք ինտենսիվ աշխատանքները»։
Անդրադառնալով իր աշխատանքային անցյալին՝ Հովսեփյանը հստակեցրեց, որ 2020 թվականի նոյեմբերի 10-ին գրել է աշխատանքից ազատվելու դիմում և մասնակցել բողոքի ակցիաների։ Այնուհետև՝ 2021 թվականի արտահերթ խորհրդարանական ընտրություններից հետո մեկնել է երեխայի խնամքի արձակուրդ, որում գտնվել է մինչև 2023 թվականը։ Հովսեփյանը պարզաբանեց, որ վերջնականապես համակարգից դուրս է եկել 2023 թվականին՝ իր դիմումի համաձայն։
Խոսելով Եվրոպական միությանը Հայաստանի հնարավոր անդամակցության մասին՝ պատգամավորը նշեց, որ այդ հարցում անհրաժեշտ է հիմնվել մասնագիտական վերլուծությունների վրա։
«Տվե՛ք ինձ համապատասխան վերլուծությունները՝ տնտեսական, իրավական, անվտանգային… Եթե դա բխում է Հայաստանի շահերից, ապա մենք չենք կարող դեմ լինել նման օրակարգին»,- ասաց նա։
Մանրամասները՝ տեսանյութում։
Եվգենյա Համբարձումյան
