«Փաշինյանը ցուցմունք է տալու մեղադրյալի կարգավիճակում, չկասկածեք»․ Դավիթ Շահնազարյան. ՏԵՍԱՆՅՈՒԹ

Ազգային անվտանգության ծառայություն հրավիրվելը Դավիթ Շահնազարյանը համարում է քաղաքական հետապնդում։ Այդ հրահանգը, ըստ նրա, ԱԱԾ-ին տվել է արձակուրդում գտնվող վարչապետի պաշտոնակատար Նիկոլ Փաշինյանը։ Շահնազարյանի խոսքով՝ եթե ԱԱԾ-ի փոխարեն իրավապահ այլ կառույց հրավիրեր, չէր գնա։ Այս տարվա ամառը մերժել է ՀՔԾ ներկայանալու «հրավերը»։

«Նոյեմբերի 27-ին ես որոշ հայտարարություններ եմ արել, որ ներկայիս կառավարությունն իր պարագլուխ Նիկոլ Փաշինյանի գլխավորությամբ իրականացնում է քաղաքականություն, որը ես ձևակերպել եմ՝ «իշխանություն՝ Արցախի փոխարեն»։ Եթե ես նոյեմբերի 27-ին եմ հայտարարությունն արել, ինչի՞ եք հիմա կանչում, որովհետև երեկ վարչապետը ուղղակիորեն դա հրահանգավորեց»,- ասաց Շահնազարյանը։ Նկատենք, որ նույն հայտարարությունը Դավիթ Շահնազարյանը կրկնել է նաև դեկտեմբերի 4-ի իր հերթական ասուլիսի ընթացքում։

Շահնազարյանը նշում է, որ իր խոսքը ոչ թե իրավական է, այլ քաղաքական և պատասխանատու է իր ամեն խոսքի համար․ «Ինչի՞ վարչապետը երեկ վախեցավ գալ բանավեճի։ Հո չէ՞ր գալիս ցուցմունք տալու, դեռ շուտ է, ինքը ցուցմունք տալու է մեղադրյալի կարգավիճակում, դրանում կարող եք չկասկածել։ Սա սպառնալիք չէ, սա խոստում է։ Գալու է այդ օրը, որ նա սկսելու է ցուցմունք տալ։ Եվ այդ դեպքում արդեն իրավապահ մարմինները կտան իրավական գնահատական»։

Շահնազարյանը կարծում է, որ Հայաստանում այսօր իրավապահ կառույցներ գոյություն չունեն․ դրանք պատժիչ կառույցներ են․ «Պետության հետ ոչ մի կապ չունեն և պաշտպանում են միայն Փաշինյանի շահերը։ Այս քաղաքական հետապնդումը ուղղված է ոչ միայն իմ դեմ։ Սա փորձ է վախեցնել այն մարդկանց, որոնք պատրաստվում են քվեարկել ՀՀԿ-ի օգտին»։