Բաքուն դատական ​​հայց է ներկայացրել CNN-ի դեմ՝ մեղադրելով ապատեղեկատվություն տարածելու մեջ

Ադրբեջանի իշխանությունները դատական ​​հայց են ներկայացրել CNN-ի դեմ ԱՄՆ Դելավեր նահանգի դաշնային դատարան, հաղորդում է կառավարամետ ադրբեջանական Report լրատվական գործակալությունը։

Հայցի հիմք է հանդիսացել հունիսի 5-ին հրապարակված CNN-ի հետաքննությունը։ Դրանում պնդվում էր, որ Իրանի դեմ պատերազմի ժամանակ Իսրայելն իր զորքերն ուղարկել է Ադրբեջան՝ Թեհրանի դեմ գործողություններին մասնակցելու համար։

«Նյութի հրապարակումից առաջ CNN-ը տեղեկացված է եղել ադրբեջանական կողմի դիրքորոշման մասին։ CNN-ի հարցմանն ի պատասխան՝ ադրբեջանական կողմը նախապես պաշտոնապես հերքել է այդ մեղադրանքները և հայտարարել, որ Ադրբեջանի տարածքի օգտագործումը որևէ երրորդ պետության կողմից Իրանի դեմ ռազմական կամ հետախուզական նպատակներով չի թույլատրվում։ Սակայն, չնայած ստացված պատասխանին, Ադրբեջանի դիրքորոշումը հոդվածում բավարար չափով չի արտացոլվել, մինչդեռ հիմնական մեղադրանքները ներկայացվել են անանուն աղբյուրներին հղումով»,- գրել է Report-ը։

Ադրբեջանական լրատվամիջոցի տվյալներով՝ Ադրբեջանի իշխանությունները երեք անգամ կապ են հաստատել CNN-ի հետ՝ խնդրելով ուղղումներ կատարել նյութում, սակայն դա չի արվել։

CNN-ի հետաքննությունում ասվում էր, որ Իսրայելը գաղտնի կերպով ստորաբաժանումներ է տեղակայել Ադրբեջանում՝ անօդաչու թռչող սարքերի միջոցով Իրանի դեմ հետախուզական և ռազմական գործողությունների համար։ Հեռուստաալիքի աղբյուրների փոխանցմամբ՝ իսրայելական ուժերը տեղակայվել են սահմանի մոտ՝ իրանական Թավրիզ քաղաքից մոտավորապես 100 կիլոմետր հեռավորության վրա։