27.09.2026 | 14:38
Համաշխարհային օլիմպիադա. Հայաստանի հավաքականները հաղթեցին վերջին տուրում
ՀԱՊԿ անդամ երկրները Հայաստանին շարունակում են դիտարկել որպես դաշնակից․ գլխավոր քարտուղար
Քաղաքականություն
15.08.2026 | 12:13
ՀԱՊԿ անդամ երկրները Հայաստանին շարունակում են դիտարկել որպես կազմակերպության դաշնակից։ Այդ մասին РИА Новости-ին հայտնել է ՀԱՊԿ գլխավոր քարտուղար Տալաթբեկ Մասադիկովը։
«Հայաստանը հենց սկզբից եղել է ակտիվ և ներդաշնակ անդամ պետություն, արժանի ներդրում է ունեցել հավաքական ներուժի ամրապնդման գործում, և ՀԱՊԿ անդամ պետությունները շարունակում են այս երկիրը դիտարկել որպես կազմակերպության դաշնակից»,- ասել է Մասադիկովը։
Նրա խոսքով՝ ՀԱՊԿ անդամ երկրները բազմիցս պատրաստակամություն են հայտնել Երևանի հետ քննարկելու Հայաստանի լիարժեք մասնակցությունը կազմակերպության համատեղ աշխատանքին վերականգնելուն վերաբերող բոլոր հարցերը։
Հայաստանը 2024 թվականին սառեցրել է իր մասնակցությունը ՀԱՊԿ աշխատանքներին։ Ավելի վաղ ՌԴ ներկայացուցիչը ՀԱՊԿ-ում՝ Վիկտոր Վասիլևը, РИА Новости-ին հայտնել էր, որ Հայաստանի՝ կազմակերպության մարմիններում ձայնի իրավունքից զրկելու համար անհրաժեշտ է կոնսենսուս։
Նրա խոսքով՝ ՀԱՊԿ Հավաքական անվտանգության խորհրդի հերթական նիստը նախատեսված է նոյեմբերի 11-ին Մոսկվայում, որի ընթացքում, հավանաբար, կքննարկվի նաև Հայաստանի ձայնի իրավունքի հարցը։
