Օջալանի հետ բանակցող պատվիրակությունը հանդիպել է Էրդողանի հետ

Թուրքիայում գործող ընդդիմադիր «Ժողովուրդների հավասարության և ժողովրդավարության» (DEM) կուսակցության «Իմրալըի պատվիրակությունը» հանդիպել է երկրի նախագահ Ռեջեփ Թայիփ Էրդողանի հետ։ Մոտ 1.5 ժամ տևած հանդիպումից հետո պատվիրակությունը քննարկումները որակել է արդյունավետ, գրում է ermenihaber-ը։

Հանդիպման ընթացքում կողմերը վերահաստատել են «Խաղաղության և ժողովրդավարական հասարակության գործընթացը» վճռականությամբ շարունակելու իրենց համատեղ կամքը։ Հատուկ անդրադարձ է կատարվել Թուրքիայի ազգային մեծ ժողովում (TBMM) 467 կողմ ձայնով ընդունված «Ազգային համերաշխության և սոցիալական համախմբման ամրապնդման մասին» օրենքին, որը հանրությանը հայտնի է նաև որպես «Շրջանակային օրենք»։

Կողմերը գոհունակություն են հայտնել օրինագծի ընդունման կապակցությամբ՝ շեշտելով, որ այն դռներ է բացում ժողովրդավարության և քաղաքական դաշտի ամրապնդման նոր փուլի համար, ինչը կարևոր է երկրի և բոլոր քաղաքացիների համար։ Իմրալըի պատվիրակությունը հայտարարել է, որ շարունակելու է աշխատանքները «հանուն խաղաղության և ժողովրդավարության հետագա առաջընթացի»։

Պատվիրակությունը նաև շնորհայալություն է հայտնել այն բոլոր ուժերին, ովքեր մինչ օրս աջակցել են, առաջարկներ են արել, զգուշացրել են ինչ-որ բանի վերաբերյալ և կամ քննադատել են իրենց:

DEM-ի անդամներից կազմված պատվիրակությունը քրդերի հետ առկա խնդիրները խաղաղ ճանապարհով լուծելու նպատակով պարբերաբար հանդիպումներ է ունենում Թուրքիայի կողմից ահաբեկչական ճանաչված Քուրդիստանի աշխատավորական կուսակցության (PKK) հիմնադիր և առաջնորդ Աբդուլլահ Օջալանի հետ, որը Իմրալը կղզու բանտում է: