Ձեր տրավման մի փաթաթեք մեր վզին, ուզում ենք անկախ լինել․ Ռուբեն Ռուբինյան. ՏԵՍԱՆՅՈՒԹ

Ազգային ժողովի նախագահ Ռուբեն Ռուբինյանն անդրադարձել է հայ-ադրբեջանական հարաբերություններին՝ վերլուծելով կոնֆլիկտի պատմական նախադրյալները և քննադատելով ընդդիմության քաղաքական գիծը։

Ռուբինյանը հակադարձել է այն տեսակետին, թե կոնֆլիկտը սկսվել է 1988-ին՝ նշելով, որ դրա «ճարտարապետությունը» ձևավորվել է դեռևս 1905 թվականին՝ հայ-թաթարական բախումների ժամանակ։ Որպես հիմնական պատճառներ՝ նա առանձնացրել է էթնոսների խառը բնակեցվածությունը և կայսերական ազդեցությունը։

«Կոնֆլիկտ ծնող համար մեկ պատճառը խառը բնակչությունն է»,- շեշտել է նա՝ հավելելով, որ կայսրությունները հակված են հրահրել նման բախումներ, երբ թուլանում են, բայց փորձում են պահել իրենց ազդեցությունը։

Անդրադառնալով կոնֆլիկտների լուծմանը՝ Ռուբինյանը բերեց Հունաստանի և Թուրքիայի օրինակը, որտեղ բնակչության տրանսֆերը հանգեցրեց էթնիկ բախումների դադարեցմանը։ Նա զգուշացրեց, որ բնակչության վերադարձի մասին խոսակցությունները վտանգավոր են պետական մակարդակում։

«Այդ բոլոր խոսակցությունները բնակչության վերադարձի մասին կոնֆլիկտածին են… Երբ որ դու դա ձևակերպում ես որպես պետական նպատակ, դա նշանակում է վերածնել կոնֆլիկտային տրամաբանությունը»,-ասել է նա։

Դիմելով Դաշնակցությանը՝ Ռուբինյանը նշեց, որ հասկանում է նրանց «քաղաքական տրավման»՝ կապված 1918-ի իրադարձությունների և անկախության կորստի հետ․ «Այդ տրավման մի՛ փաթաթեք մեր վզին, մենք ուզում ենք անկախ լինել և մենք չենք ուզում, որպեսզի օտար պետությունները մեր վրա ճնշում գործադրեն»։

Ելույթի ավարտին նա կրկին հորդորեց ընդդիմությանը՝ օտարի շահերը սպասարկելու փոխարեն սատարել սեփական պետությանը։

Մանրամանսերը՝ տեսանյութում։

Եվգենյա Համբարձումյան