Քաղաքականություն
13.08.2026 | 14:57
Բռնակցված Սևաստոպոլում տեղի ունեցած պայթյունի հետևանքով տղամարդ է զոհվել, հաղորդում են անվտանգության ուժերին մոտ գտնվող Telegram Mash և Baza ալիքները։
Ըստ աղբյուրների՝ պայթյունը տեղի է ունեցել օգոստոսի 13-ի առավոտյան Ստոլետովսկի պողոտայի բնակելի թաղամասի մոտ՝ այգում։ Ականատեսները պատմել են, որ պայթյունը տեղի է ունեցել, երբ տղամարդն ընկերոջ հետ իջնում էր աստիճաններով։ Նախնական տվյալներով՝ պայթուցիկ սարքը տեղադրված է եղել նստարանի կողքին գտնվող աղբամանում, գրում է Meduza-ն։
Telegram ալիքները չեն հայտնում մահացածի ինքնությունը։
«ВЧК-ОГПУ» տելեգրամյան ալիքը պնդում է, որ մահացած տղամարդը Ռուսաստանի ռազմածովային ուժերի սպա Ռոբերտ Շագեևն է։ Այս մասին հաղորդում է նաև բլոգեր Անատոլի Շարին։ Այս տեղեկատվության հաստատում չկա:
«112» տելեգրամյան ալիքը հաղորդում է, որ պայթյունի հետևանքով մահացել է առաջին կարգի կապիտան: Ալիքը չի նշում նրա անունը։
Շագեևն Ուկրաինայի միակ սուզանավի՝ «Զապորոժիե»-ի նախկին հրամանատարն է, որը դեռևս 2014 թվականին՝ Ղրիմի բռնակցումից հետո, անցել է Ռուսաստանի կողմը և առանց մարտի հանձնել սուզանավը: Ավելի ուշ նա դարձել է Ռուսաստանի Սևծովյան նավատորմի 4-րդ առանձին սուզանավային բրիգադի փոխհրամանատար:
Ուկրաինան նրա դեմ պետական դավաճանության գործ է հարուցել: Ուկրաինայի պետական քննչական բյուրոն պնդում է, որ Շագեևը մասնակցում է Ուկրաինայի դեմ լայնածավալ պատերազմին:
