Չինաստանի հաքերները ԱԲ գործակալների միջոցով հարձակվել են Թայվանի պետական համակարգերի վրա

Չինաստանի հետ կապ ունենալու մեջ կասկածվող հաքերները բաց կոդով արհեստական բանականության գործակալների միջոցով կիբեռհարձակում են իրականացրել Թայվանի պետական համակարգերի դեմ։ Այս մասին հայտնում է Financial Times-ը՝ վկայակոչելով իսրայելական Dream կիբեռանվտանգության ընկերության հետազոտությունները։

Հետազոտողների տվյալներով՝ հարձակման ընթացքում օգտագործվել է մինչև ութ ԱԲ գործակալ, որոնք գրեթե ինքնուրույն գործել են որպես համակարգված կիբեռխումբ։ Հուլիսի սկզբին նրանք քարտեզագրել են Թայվանի 21 պետական համակարգ՝ խոցելիություններ հայտնաբերելու և ներթափանցելու նպատակով։

Հարձակվողներին հաջողվել է կոտրել առնվազն 85 օգտահաշիվ և գողանալ պետական համակարգերի աշխատակիցների վերաբերյալ ավելի քան 2,5 հազար գրառում։ Հետագայում հարձակումը տարածվել է նաև Թայվանի միջուկային անվտանգության գործակալության և առնվազն յոթ էներգետիկ ընկերությունների համակարգերի վրա։

Dream-ի հետազոտողները հաքերների գործողություններն ուղղակիորեն չեն վերագրել Չինաստանի իշխանություններին, սակայն հարձակման հետ կապված ներքին հաղորդագրություններում պարզեցված չինարենի օգտագործումը, ըստ նրանց, վկայում է Չինաստանի հետ հնարավոր կապի մասին։ Թայվանի թվային հարցերի նախարարությունը հրաժարվել է միջադեպը մեկնաբանել՝ նշելով տեղեկատվության գաղտնիությունը։

Հետազոտողները միջադեպը ներկայացնում են որպես ԱԲ գործակալների միջոցով իրականացված աննախադեպ կիբեռհարձակման օրինակ։