Հալածանքների եմ ենթարկվել ՊԵԿ-ում․ Հայկ Ֆարմանյան. ՏԵՍԱՆՅՈՒԹ

Ազգային ժողովում Ֆինանսավարկային և բյուջետային հարցերի մշտական հանձնաժողովի նախագահի թեկնածու Հայկ Ֆարմանյանը պատասխանել է պատգամավոր Սիսակ Գաբրիելյանի հարցերին, որոնք վերաբերում էին պետական պարտքի նկատմամբ վերաբերմունքին և ընդդիմադիր դառնալու դրդապատճառներին։

Սիսակ Գաբրիելյանի այն դիտարկմանը, թե արդյոք կա աշխարհում որևէ երկիր, որը պարտքը չի վճարել և սնանկ է ճանաչվել, Հայկ Ֆարմանյանը նշել է, որ խնդիրը պարտքի կայուն կառավարելիության մեջ է։

«Ես ասում եմ՝ մենք մեր տնտեսության մեջ ունենալու ենք պետական պարտքի կայուն կառավարելիության խնդիր։ Իսկ ինչ վերաբերում է նրան, թե ինչ է տեղի ունենալու՝ գուցե սնանկ հայտարարվի երկիրը»,- նշել է թեկնածուն՝ որպես օրինակ բերելով պարտքերի տակ հայտնված գործարարի վիճակը։

Սիսակ Գաբրիելյանն իր հերթին հարցադրում է արել, թե արդյոք պետական պարտքի մասին հայտարարություններով հասարակությանը չեն «սարսափեցնում»։
«Կարո՞ղ եք ասել մի երկիր, որ պետական պարտք է վերցրել, չի տվել ու ի՞նչ է եղել… այդ միջազգային բանկերը զորք են հավաքում, գալիս կառավարության շենքերն են գրավո՞ւմ»,- հարցրել է պատգամավորը։

Հայկ Ֆարմանյանը շեշտել է, որ ինքը եղել է ՊԵԿ-ի պրոֆեսիոնալ ծառայող և 2019 թվականին գործող իշխանության օրոք ենթարկվել է հալածանքների ու ապօրինի ազատվել Պետական եկամուտների կոմիտեից։

«Ինձ ուղիղ ասվել է, որ պետք է դիմում գրեմ ձեր իշխանության օրոք՝ 2019 թվականին։ Եթե դուք հիմա ուսումնասիրեք Պետական եկամուտների կոմիտեի կառուցվածքը, ապա կտեսնեք, որ միայն Արևմտյան մաքսատուն-վարչությունում է երկու իրար հետ կապ չունեցող բաժին միավորվել միայն այն բանի համար, որ ինձ կարողանան ազատել աշխատանքից»,- պարզաբանել է Ֆարմանյանը։

Նա հավելել է, որ դատական բոլոր ատյանները, ներառյալ Վճռաբեկ դատարանը, հաստատել են իր ազատման ապօրինի լինելը։

Մանրամասները՝ տեսանյութում։

Եվգենյա Համբարձումյան