Քաղաքականություն
11.08.2026 | 17:40Ազգային ժողովի «Քաղաքացիական պայմանագիր» խմբակցության պատգամավոր Վիլեն Գաբրիելյանը խորհրդարանի ամբիոնից ունեցած իր ելույթում անդրադարձել է հասարակական-քաղաքական գործիչ Էդգար Ղազարյանի հայտարարություններին, ինչպես նաև քաղաքականության մեջ հոգևորականների ներգրավվածությանն ու օրենքի առջև բոլորի հավասարության սկզբունքին։
Անդրադառնալով Էդգար Ղազարյանի ելույթին՝ Վիլեն Գաբրիելյանն առաջարկել է գործընկերներին չմտնել նրա հետ բանավեճի մեջ․
«Ես կարծում եմ, որ մեր գործընկեր, «Ուժեղ Հայաստան»-ի անդամ պարոն Ղազարյանին պետք է թողնել այն վայբի մեջ, որի մեջ ինքը եղել է մինչև Ազգային ժողովի պատգամավոր դառնալը։ Եկեք իրեն թողնենք «Ղազարյան VS Ղազարյան» շրջանակի մեջ, թող ինքը դուրս գա, ելույթ ունենա, ինքն իրեն հարց տա, ինքն իրեն պատասխանի։ Կարծում եմ՝ այդպես այս ինստիտուտի հանդեպ շատ ավելի հարգալից վերաբերմունք կլինի»,- ասաց պատգամավորը։
Խոսելով եկեղեցի-իշխանություն հարաբերությունների մասին՝ Վիլեն Գաբրիելյանն ընդգծել է, որ տեղի ունեցողը կրոնական վեճ չէ, այլ զուտ քաղաքական բանավեճ, որը նախաձեռնվել է հենց հոգևորականների կողմից․
«Սա կրոնական բանավեճ չէ, սա քաղաքական բանավեճ է, որը փաստացի սկսվել է այն պահից, երբ Հայ Առաքելական եկեղեցու ներկայացուցիչները «Սրբազան պայքարով», խաչակրաց արշավանքի պես դուրս եկան տվյալ պահին Հայաստանի Հանրապետության կառավարող ուժի դեմ։ Չգրված օրենքներ կան, որ զինվորականներին և հոգևորականներին չի կարելի զբաղվել քաղաքականությամբ։ Ինչպես չի կարելի, որ զինվորականները համազգեստով դուրս գան ու ասեն՝ մենք սկսում ենք զբաղվել քաղաքականությամբ, նույնը վերաբերում է հոգևորականներին»,- ասաց Գաբրիելյանը։
Մանրամասները՝ տեսանյութում։
Անի Թամրազյան
