Քաղաքականություն
06.08.2026 | 11:10
ՌԴ Յարոսլավլում ուկրաինական անօդաչու թռչող սարքերի հարձակումից հետո հրդեհ է բռնկվել «Սլավնեֆտ» ընկերությանը պատկանող «Յարոսլավնեֆտեօրգսինթեզ» նավթավերամշակման գործարանում։ Այս մասին հաղորդում են ուկրաինական Supernova+ և Exilenova+ տելեգրամյան ալիքները, ինչպես նաև Astra-ն։ Ականատեսների հրապարակած լուսանկարներում և տեսանյութերում երևում են ծխի մի քանի խոշոր սյուներ, գրում է Meduza-ն։
Յարոսլավլի մարզի նահանգապետ Միխայիլ Եվրաևն օգոստոսի լույս 6-ի գիշերը հայտնել է, որ մարզը ենթարկվել է ուկրաինական անօդաչու թռչող սարքերի հարձակման: Հարվածի ֆոնին Յարոսլավլից դեպի Մոսկվա տրանսպորտի երթևեկությունը դադարեցվել է, ինչի հետևանքով մի քանի ավտոբուսային երթուղիներ ստիպված են եղել փոխել ուղղությունները։
Առավոտյան Եվրաևը հայտարարել է, որ Յարոսլավլի մարզը հետ է մղել «թշնամու անօդաչուների ամենազանգվածային հարձակումը». ռադիոէլեկտրոնային պայքարի և հակաօդային պաշտպանության ուժերը ոչնչացրել են 88 անօդաչու։
Հարձակման հետևանքով այրվել է մասնավոր տուն, կոտրվել են մի քանի բնակելի շենքերի պատուհաններ, վնասվել են մեքենաներ: Եվրաևը չի նշել ճշգրիտ վայրը: Նա ասել է, որ զոհեր կամ վիրավորներ չկան: Նահանգապետը չի բացատրել զանգվածային հրդեհները։
«Յարոսլավնեֆտեoրգսինտեզը» («Славнефть-ЯНОС») Ռուսաստանի հինգերորդ խոշորագույն նավթավերամշակման գործարանն է։ 2026 թվականի սկզբից ի վեր Ուկրաինան առնվազն վեց անգամ հարձակվել է այդ օբյեկտի վրա։
Տվերի մարզի նահանգապետ Վիտալի Կորոլյովն էլ հայտնել է, որ անօդաչու թռչող սարքերի բեկորների անկման հետևանքով «աննշան» վնասվել է Wildberries լոգիստիկ կենտրոնի ճակատային մասը: Կալինինսկի շրջանում, նրա խոսքով, «անօդաչուների բեկորները» վնասել են այգեգործական համայնքի մի քանի օժանդակ շինություններ: Ոչ ոք չի տուժել:
Ռուսաստանի ՊՆ-ն հայտարարել է, որ օգոստոսի լույս 6-ի գիշերը Բելգորոդի, Բրյանսկի, Վլադիմիրի, Վորոնեժի, Կալուգայի, Կուրսկի, Լիպեցկի, Նիժնի Նովգորոդի, Օրյոլի, Ռոստովի, Ռյազանի, Սմոլենսկի, Տամբովի, Տվերի, Տուլայի, Յարոսլավլի, Մոսկվայի մարզերի, Կրասնոդարի երկրամասի, բռնակցված Ղրիմի և Ազովի ու Սև ծովերի վրա խոցվել է ուկրաինական 605 ԱԹՍ։
Թարգմանությունը՝ Էմմա Չոբանյանի
