Էրդողանի դաշնակից Բահչելին կոչ է արել ազատ արձակել Օջալանին ու Դեմիրթաշին

Թուրքիայի Ազգայնական շարժում կուսակցության (MHP) առաջնորդ Դևլեթ Բահչելին, որը նախագահ Ռեջեփ Թայիփ Էրդողանի դաշնակիցն է, վերահաստատել է իր կոչը Քրդական աշխատավորական կուսակցության (PKK) բանտարկված առաջնորդ Աբդուլլահ Օջալանին «հույսի իրավունք» տրամադրելու վերաբերյալ։ Նա նաև կոչ է արել ազատ արձակել Ժողովրդադեմոկրատական ​​կուսակցության նախկին համանախագահ Սելահաթթին Դեմիրթաշին։

Բահչելին այս հայտարարությունն արել է նախաձեռնության հետ կապված առաջարկվող շրջանակային օրինագիծը ստորագրելուց հետո՝ պնդելով, որ օրենսդրությունը ևս մեկ քայլ է ազգային միասնության ամրապնդման ուղղությամբ։

«Այս ստորագրությամբ մեր հազարամյա եղբայրությունը կրկին վերահաստատվել է։ Թուրքերը, քրդերը և բոլորը՝ անկախ իրենց լեզվից կամ ինքնությունից, հաղթել են։ Մեր 86 միլիոն քաղաքացիները և Մերձավոր Արևելքի ժողովուրդները հաղթել են։ Միևնույն ժամանակ, առաջին քայլն է արվել գլոբալ նախագծերը խափանելու համար»,- ասել է նա։

Բահչելին նախաձեռնությունը բնութագրել է որպես պետական կառույցների կողմից համակարգված գործընթաց՝ նշելով, որ խորհրդարանն անհրաժեշտ նախաձեռնությունն արդեն ցուցաբերել է, իսկ պետական մարմիններն իրականացնում են պահանջվող աշխատանքները։

«Սա պետական նախագիծ է։ Մեր խորհրդարանն այս հարցում կատարել է անհրաժեշտ քայլերը։ Մեր պետությունն իրականացնում է անհրաժեշտ աշխատանքները։ Մենք բոլորս միասին կհետևենք այս գործընթացին»,- ասել է նա։

Նա նշել է, որ Դեմիրթաշի հետ շարունակում է կապ պահպանել նրա փաստաբանների միջոցով։

«Սելահաթթին Դեմիրթաշը պետք է վերադառնա տուն, «Ահմեթները» (Մարդինի նախկին քաղաքապետ Ահմեթ Թուրքը և պաշտոնից հեռացված Էսենյուրթի քաղաքապետ Ահմեթ Օզերը) պետք է վերադառնան իրենց պաշտոններին, իսկ Օջալանին պետք է տրամադրվի «հույսի իրավունքը»։ Թուրքիան պետք է խաղաղություն գտնի։ Մեր նպատակը Թուրքիայի և ամբողջ տարածաշրջանի խաղաղությունն է»,- հայտարարել է թուրք գործիչը։

Առաջարկվող շրջանակային օրինագիծը նախատեսված է «ահաբեկչությունից զերծ Թուրքիա» նախաձեռնության հաջորդ փուլի համար իրավական հիմք ապահովելու համար, որի նպատակն է ավարտել PKK-ի զինաթափումն ու լուծարումը։

«Հույսի իրավունքն» իրավական սկզբունք է, որը ձևավորվել է Մարդու իրավունքների եվրոպական դատարանի (ՄԻԵԴ) նախադեպային իրավունքի հիման վրա։ Այն նախատեսում է, որ ցմահ ազատազրկման դատապարտված անձինք պետք է ունենան ազատ արձակման իրական հնարավորություն՝ իրենց պատժի պարբերական վերանայման միջոցով, եթե ապացուցեն, որ այլևս վտանգ չեն ներկայացնում հասարակության համար։

Թարգմանությունը՝ Էմմա Չոբանյանի