27.09.2026 | 16:24
Ադրբեջանում երկրաշարժ է գրանցվել
Պուտինը ստորագրել է քաղաքական էմիգրանտների իրավունքները սահմանափակող օրենքը
Քաղաքականություն
04.08.2026 | 21:17
ՌԴ նախագահ Վլադիմիր Պուտինը ստորագրել է օրենքը, որով սահմանափակումներ են սահմանվում արտերկրում բնակվող Ռուսաստանի այն քաղաքացիների նկատմամբ, ովքեր քրեական կամ վարչական գործերով հեռակա կարգով դատապարտվել են։ Փաստաթուղթն ուժի մեջ է մտնում ստորագրման պահից, գրում է Current time-ը։
Օրենքը քաղաքական էմիգրանտներին արգելում է ստանալ արտասահմանյան անձնագրեր և օգտվել դեսպանատներում մատուցվող հյուպատոսական ծառայություններից։ Բացի այդ, նրանք կզրկվեն Ռուսաստանում իրենց գույքն ու ֆինանսական միջոցները տնօրինելու իրավունքից։
Օրենքը նաև առաջարկում է սառեցնել բանկային հաշիվները և սահմանափակել բանկային բջջային հավելվածներին հասանելիությունը՝ դրամական փոխանցումները կանխելու համար։
Ռուսաստանում վաստակած և ստացված բոլոր միջոցները, օրինակ՝ կենսաթոշակները, կազմակերպություններից և անհատներից ստացված վճարումները, կուղարկվեն հատուկ ռուբլային հաշվին, որից կարող են վճարվել միայն դատարանի կողմից նշանակված տուգանքները։ Միաժամանակ, Ռուսաստանից մեկնած անձանց մերձավոր ազգականներին, որոնք չունեն սեփական եկամտի աղբյուր, կարող է նշանակվել ամսական նպաստ, որը կվճարվի նրանց սառեցված դրամական միջոցներից։
Օրինագիծը Ռուսաստանի Պետական դումա էր ներկայացվել 2025 թվականի դեկտեմբերին և նույն ամսին ընդունվել առաջին ընթերցմամբ։
Հուլիսի 22-ին օրինագիծը Ռուսաստանի խորհրդարանի Ստորին պալատի կողմից միանգամից ընդունվել էր երկրորդ և երրորդ ընթերցումներով։
Թարգմանությունը՝ Էմմա Չոբանյանի
