ԵՄ-ն միասնական է Սեուտայի ճգնաժամի հարցում․ ՆԳ նախարարների արտահերթ տեսակոնֆերանսն ավարտվել է

Նախատեսվածից շուրջ մեկ ժամ ավելի է տևել Եվրոպական Միության անդամ երկրների Ներքին գործերի նախարարների ոչ պաշտոնական տեսակոնֆերանսը։

Հանդիպումից րոպեներ անց ԵՄ մամուլի ծառայությունից հայտնեցին, որ  տեսակոնֆերանսի ընթացքում քննարկել են Իսպանիայի էսքլավ Սեուտայում տեղի ունեցած վերջին զարգացումներն ու ԵՄ արտաքին սահմաններում տիրող իրավիճակը։ Եվրամիությունը հանդես է եկել միասնական դիրքորոշմամբ՝ լիակատար աջակցություն հայտնելով Իսպանիային և ընդգծելով, որ միգրացիոն մարտահրավերները պահանջում են հավաքական եվրոպական արձագանք։

Հանդիպման ընթացքում Իսպանիայի պատվիրակությունը, Եվրոպական հանձնաժողովը և Եվրոպական արտաքին գործողությունների ծառայությունը (ԵԱԳԾ) ներկայացրել են իրենց գնահատականներ վերջին օրերի իրադարձությունների վերաբերյալ։ Նախարարներն ու Շենգենյան գոտու ասոցացված երկրների ներկայացուցիչները բարձր են գնահատել Իսպանիայի իշխանությունների արագ ու արդյունավետ գործողությունները Սեուտայում և խորին ցավակցություն հայտնել սահմանն անցնելու փորձերի ընթացքում զոհվածների հարազատներին։

«Մենք բարձր ենք գնահատում Իսպանիայի արագ արձագանքը Սեուտայում տիրող իրավիճակին և մեր խորին ցավակցությունն ենք հայտնում մարդկային ողբերգական կորուստների կապակցությամբ: ԵՄ արտաքին սահմանները մեր ընդհանուր պատասխանատվությունն են, իսկ միգրացիան պահանջում է եվրոպական միասնական արձագանք: Այսօրվա հանդիպումը կարևոր հնարավորություն ընձեռեց անդամ պետություններին գնահատելու արդեն իսկ մեր տրամադրության տակ եղած գործիքները, հստակեցնելու հետագա համագործակցության անհրաժեշտությունը և առաջ մղելու մեր հավաքական նախապատրաստությունները հոկտեմբերին կայանալիք նախարարական հաջորդ հանդիպումից և Եվրոպական խորհրդի նիստից առաջ»,- ասել է քննարկումը նախաձեռնած Իռլանդիայի արդարադատության, ներքին գործերի և միգրացիայի նախարար Ջիմ Օ’Քալահանը։

Իսպանական իշխանությունների և Եվրոպական հանձնաժողովի փոխանցած վերջին տվյալների համաձայն՝ Մարոկկոյից ապօրինի սահմանն անցած անձանց ճնշող մեծամասնությունն արդեն ետ է վերադարձվել։ Ընդ որում, դեպի մայրցամաքային Իսպանիա կամ ԵՄ այլ անդամ երկրներ հետագա տեղաշարժեր չեն արձանագրվել։

Ըստ ԵՄ մամուլի ծառայության՝  ձևավորվել է ընդհանուր համաձայնություն առ այն, որ անհրաժեշտ է պայքարել միգրանտների մաքսանենգությամբ զբաղվող ցանցերի դեմ, ուժեղացնել հետվերադարձման գործընթացները, ամրապնդել ԵՄ սահմանները և բարելավել կանխատեսման կարողությունները։

Առանձնահատուկ շեշտադրում է կատարվել երրորդ երկրների հետ խորը գործընկերությունների ձևավորման վրա, ինչը հնարավորություն կտա պատշաճ հնարավորություններ ստեղծել մարդկանց համար իրենց ծագման երկրներում և բարելավել միգրացիայի կառավարումը։

Բացի այդ, նախարարներն ընդգծել են վաղ ազդարարման համակարգերի՝ մասնավորապես նախասահմանային հետախուզության և սոցիալական ցանցերի մոնիտորինգի զարգացման անհրաժեշտությունը՝ իրավիճակային ընդհանուր իրազեկվածությունը բարձրացնելու նպատակով։

ԵՄ մամուլի ծառայությունը  տեղեկատվություն չի հայտնել, թե արդյոք  հանդիպման ժամանակ քննարկվել է ԵՄ-ից դուրս միգրանտների պահման կենտրոնների հնարավոր վայրերի ստեղծման հարցը։  Այդ երկրների թվում երեկվանից շրջանառվում էր  նաև Հայաստանի անունը։

Ենթադրվում է, որ այդ հարցինավելի ուշ կանդրադանա Ներքին գործերի և միգրացիայի հարցերով ԵՄ հանձնակատար Մագնուս Բրունները լրագրողների հետ հանդիպմանը։

Կարինե Ասատրյան

Բրյուսել