Վենդետա լինելու է. Ռուբինյանը` Աղվան Վարդանյանին․ ՏԵՍԱՆՅՈւԹ

Ազգային ժողովի նիստերի դահլիճում հարցուպատասխան է տեղի ունեցել «Հայաստան» դաշինքի պատգամավոր Աղվան Վարդանյանի և ԱԺ նախագահի թեկնածու Ռուբեն Ռուբինյանի միջև։

Աղվան Վարդանյանը, դիմելով Ռուբինյանին, արձանագրել է, որ իշխող ուժի ներկայացուցիչները նախկինում հայտարարել են ընդդիմադիր պատգամավորներին «իբրև հանցագործների» վերաբերվելու մասին։ Նա հիշեցրել է, որ պատգամավորները ժողովրդի կողմից ընտրված ներկայացուցիչներ են և ոչ թե քրեակատարողական հիմնարկների կալանավորներ։ Անդրադառնալով Ռուբինյանի «վենդետա լինելու է» հայտարարությանը՝ Վարդանյանը զգուշացրել է, որ վենդետան երբեք միակողմանի չի լինում և շարունակվում է անընդհատ։

Ի պատասխան՝ Ռուբեն Ռուբինյանը վերահաստատել է իր առաջարկը՝ սկսել հարաբերությունները «զրոյական կետից», բայց միևնույն ժամանակ պարզաբանել է իր դիրքորոշումը վենդետաների վերաբերյալ։ Նա նշել է, որ 2018 թվականին իշխանությունը հայտարարել էր՝ վենդետաներ չեն լինելու, սակայն նախկին ուժերը չօգտագործեցին «ուղղվելու հնարավորությունը»։՛

Ռուբինյանը շեշտել է. «Վենդետա լինելու է՝ բառիս իրավական իմաստով», ինչը ենթադրում է, որ հանցագործություն կատարած յուրաքանչյուր ոք պետք է պատժվի։ Նա նաև հավելել է, որ քաղաքական իմաստով ևս վենդետա է լինելու, քանի որ քաղաքական ուժերը պետք է պատասխանատվություն կրեն իրենց գործողությունների համար՝ օրենքի շրջանակներում։

Անդրադառնալով ԱԺ նախագահի պաշտոնին՝ Ռուբինյանը պարզաբանել է, որ թեև Սահմանադրությունը չի պահանջում քաղաքական նեյտրալություն, սակայն ինքը խոստանում է նիստերը վարելիս լինել լիապես չեզոք։ Աղվան Վարդանյանի հեգնական առաջարկով՝ ընտրվելու դեպքում գոնե առաջին վեց ամիսը «ներքև չիջնել» նախագահողի աթոռից, ինչին Ռուբինյանը պատասխանել է, որ կմտածի այդ մասին։

Մանրամասները՝ տեսանյութում։