Թրամփը կհանդիպի կաբինետի անդամների հետ՝ քննարկելու Իրանի հետ պատերազմի հարցը

ԱՄՆ նախագահ Դոնալդ Թրամփն այսօր ավելի ուշ Քեմփ Դեյվիդի նստավայրում կաբինետի նիստ կգումարի, որտեղ կքննարկի՝ ինչպես լուծել Իրանի դեմ իր պատերազմի հարցը, գրում է The Guardian-ը։

Նա նաև կցանկանա գտնել բենզինի գներն իջեցնելու միջոց, քանի որ հանրապետականները մոտենում են նոյեմբերի միջանկյալ ընտրություններին։ Սա նրա պաշտոնավարման երկրորդ ժամկետի ընթացքում Քեմփ Դեյվիդ ընդամենը երրորդ այցն է․ Թրամփը գրեթե չի այցելել Արևմտյան Մերիլենդ նահանգի լեռան գագաթին գտնվող նախագահական հանգստավայր։

Սպիտակ տան մամուլի քարտուղար Քարոլայն Լիվիթն անցյալ շաբաթ ճեպազրույցի ժամանակ ասել էր, որ սա Թրամփի պաշտոնավարման երկրորդ ժամկետի 13-րդ կաբինետի նիստն է, և որ դա «շատ զվարճալի և տարբերվող բան կլինի կաբինետի անդամների համար»։

Հանդիպման օրակարգը, հավանաբար, մեծապես կկենտրոնանա արտաքին քաղաքականության վրա, հաղորդում է Reuters-ը:

Թրամփը շարունակում է Իրանի թիրախների դեմ հարվածները՝ առանց որևէ ավարտի, որը, ըստ ԱՄՆ նախագահի, սկզբում տևելու էր ընդամենը մի քանի շաբաթ, բայց արդեն հինգ ամիս է անցել։

Իրանական պատերազմը բենզինի գների կտրուկ աճի պատճառ է դարձել և բացասաբար է անդրադարձել նրա ժողովրդականության վրա ամբողջ ԱՄՆ-ում: Այս շաբաթ Reuters-Ipsos-ի հարցումը ցույց է տվել, որ ամերիկացիների միայն մեկ երրորդն է աջակցում պատերազմին, ինչը հարցման մեջ ամենացածր ցուցանիշն է հակամարտության սկզբնական օրերից ի վեր։

Մինչ այդ, Դոնալդ Թրամփը հինգշաբթի երեկոյան հայտարարել է, որ իր նախաձեռնած, այսպես կոչված, «Խաղաղության խորհուրդը» համաձայնության է եկել ՀԱՄԱՍ-ի զինյալների և Գազայի այլ զինված խմբավորումների լիակատար զինաթափման վերաբերյալ: Իսրայելը դեռևս պաշտոնապես չի արձագանքել այս ծրագրին։

Թարգմանությունը՝ Էմմա Չոբանյանի