Կիպրոսում Մեծ Բրիտանիայի ավիաբազայում ադրբեջանցի է ձերբակալվել Իրանի օգտին լրտեսության կասկածանքով

Կիպրոսում ադրբեջանցի է ձերբակալվել բրիտանական RAF Akrotiri ռազմաօդային բազայում «թշնամական հսկողություն իրականացնելու և Իրանի Իսլամական հեղափոխության պահապանների կորպուսին (ԻՀՊԿ) տեղեկություններ փոխանցելու» մեղադրանքով։ Այս մասին հայտնում է Մեծ Բրիտանիայի ոստիկանությունը։

Հաղորդվում է, որ Կիպրոսում կալանավորվել է մի տղամարդ՝ Ազգային անվտանգության մասին օրենքի կիրառմամբ առաջին հետաքննության շրջանակում, որը կապված է անդրծովյան տարածքում ենթադրյալ հանցագործությունների հետ։ 44-ամյա Ռաշադ Սուլթանովը, որը Մեծ Բրիտանիայի և Ադրբեջանի երկքաղաքացի է, ձերբակալվել է հուլիսի 17-ին, Կիպրոսի իշխանությունների կողմից։ Ներկայում նա կալանքի տակ է՝ մինչ արտահանձնման գործընթացը շարունակվում է։

Սուլթանովը կալանավորվել է Լոնդոնի հակաահաբեկչական ոստիկանության կողմից վարվող հետաքննության շրջանակում, որը վերաբերում է 2025 թվականի մայիսի 11-ից մինչև հունիսի 22-ը RAF Akrotiri բազայում տեղի ունեցած միջադեպերին։ Նա, ենթադրաբար, հսկողություն է իրականացրել բազայում, որն արգելված վայր է, այնուհետև տեղեկություններ է փոխանցել Իսլամական հեղափոխության պահապանների կորպուսին։

Թագավորական դատախազությունը (CPS) թույլատրել է մեղադրանքներ առաջադրել «Ազգային անվտանգության մասին» օրենքի 3-րդ և 4-րդ հոդվածներով։

«Այս դեպքը ցույց է տալիս, որ մենք կարող ենք օգտագործել Ազգային անվտանգության մասին օրենքը արտասահմանում, երբ բրիտանական ռազմաբազաները, ենթադրաբար, թշնամական պետական ​​գործունեության թիրախ են դառնում։ Մեծ ծավալի գործընկերային աշխատանք է իրականացվել բրիտանական և կիպրական իրավապահ մարմինների միջև»,- ասել է Լոնդոնի հակաահաբեկչական ոստիկանության ղեկավար Հելեն Ֆլանագան։

Թարգմանությունը՝ Էմմա Չոբանյանի