02.11.2026 | 16:25
Թրամփը սպառնացել է ընտրություններում դեմոկրատների հաղթանակի դեպքում դառնալ «Պարոն վետո»
Պուտինը վախենում է Հայաստանի եվրոպական ընտրությունից․ ՌԴ նախկին վարչապետ Միխայիլ Կասյանով․ ՏԵՍԱՆՅՈՒԹ
Քաղաքականություն
30.07.2026 | 20:30
Ռուսաստանի նախագահ Վլադիմիր Պուտինը վախենում է նախկին խորհրդային հանրապետությունների ու Եվրամիության մերձեցումից և փորձում է վախեցնել Հայաստանին երկկողմ հարաբերությունների վատթարացման հնարավորությամբ: Այս մասին Factor TV-ին տված հարցազրույցում հայտարարել է Ռուսաստանի նախկին վարչապետ Միխայիլ Կասյանովը։
Կասյանովի կարծիքով՝ Մոսկվայի ճնշումը Երևանի վրա կշարունակվի խորհրդարանական ընտրություններից հետո, քանի որ Ռուսաստանի ղեկավարությունը պատրաստ չէ ընդունել Հայաստանի ինքնուրույն արտաքին քաղաքական կուրսը: Նա կարծում է, որ այս հարցում Ռուսաստանի ներկայիս իշխանությունների հետ փոխզիջումն անհնար է. Մոսկվան կօգտագործի տնտեսական, էներգետիկ և ճնշման այլ լծակներ: Միաժամանակ, նա կոչ է արել Հայաստանին հետևողականորեն հետևել ընտրություններում հասարակության կողմից աջակցվող կուրսին։
Նա նաև անդրադարձել է Ռուսաստանի կողմից Ուկրաինայի դեմ սանձազերծած պատերազմին: Կասյանովի խոսքով՝ Պուտինը հասկանում է պատերազմը դադարեցնելու անհրաժեշտությունը, բայց այլևս ի վիճակի չէ այն ինքնուրույն դադարեցնել: Մինչդեռ, պատերազմից և դրա հետևանքներից դժգոհությունն աճում է նույնիսկ նախկինում կառավարությանը հավատարիմ ռուսաստանցիների շրջանում, չնայած այն դեռևս չի վերածվել զանգվածային բողոքի ցույցերի: Կասյանովը վստահ է, որ եթե Պուտինը հեռանա պաշտոնից, նրա ցանկացած իրավահաջորդ կձգտի հնարավորինս արագ ավարտել պատերազմը և սկսել վերականգնել հարաբերություններն Արևմուտքի ու հարևան երկրների հետ։
Նախկին վարչապետը Պուտինից հետո Ռուսաստանի անխուսափելի վատթարացման մասին պնդումներն անվանել է «կրեմլյան նարատիվ», որն ակտիվորեն տարածվում է, այդ թվում՝ Արևմուտքում։ Նա կարծում է, որ անցումային շրջանը դժվար ու երկար կլինի, և Պուտինից հետո առաջին ընտրությունները կարող են պահպանել իմիտացիոն բնույթը, քանի որ իշխանությունը կմնա գործող համակարգի ներկայացուցիչների ձեռքում։ Այնուամենայնիվ, նույնիսկ «պուտինյան ոճի» նոր ղեկավարությունը ստիպված կլինի աստիճանաբար չափավորել ներքին և արտաքին քաղաքականությունը։
Կասյանովը նաև խոսել է այն մասին՝ արդյո՞ք Ռուսաստանի ժողովրդավարական ընդդիմությունը պահպանել է կապը հասարակության հետ, ինչպիսի՞ն կարող է լինել ընդդիմադիր ուժերի վերադարձը երկրի քաղաքական կյանք, և ինչո՞ւ իշխանափոխությունից հետո Պուտինի ներկայիս դաշնակիցները կարող են սկսել հեռանալ նրա ժառանգությունից։
Հարցազրույցն ամբողջությամբ՝ տեսանյութում։
Սամվել Մելիքսեթյան
