Կլինի պրոցես, եթե որևէ մեկը խախտել է մեր կանոնադրությունը. Արսեն Թորոսյան․ ՏԵՍԱՆՅՈՒԹ

Կհեռացվի՞ արդյոք ՔՊ խմբակցության ղեկավար Հայկ Կոնջորյանը՝ եղբոր միջադեպից հետո. այս մասով լրագրողներն այսօր հարց ուղղեցին ՀՀ աշխատանքի և սոցիալական հարցերի նախարար Արսեն Թորոսյանին։

Վերջինս շեշտեց՝ հարցին պետք է մոտենալ երկու հարթությունում՝ իրավական և կուսակցական․ «Նախ՝ իրավական, քրեաիրավական. իրավապահ մարմինները պետք է պարզեն եղելությունը, և մեղավորները, եթե այդպիսիք կան, օրենքով սահմանված կարգով պատասխանատվություն կրեն։ Եվ երկրորդ՝ կուսակցական կարգապահության տեսանկյունից. մենք ունենք ինստիտուտներ կուսակցությունում, որոնք գործել են և գործում են։ Եղել են դեպքեր, երբ մենք կուսակցությունից հեռացրել ենք մարդկանց տարբեր պատճառներով։ Նկատի ունեմ՝ այդ երկու մեխանիզմով պետք է գնանք առաջ, և երբ կլինեն որոշումներ կուսակցության մասով, դրա մասին կտեղեկացվի»։

Հարցին՝ արդյո՞ք Հայկ Կոնջորյանը պետք է պատասխանատվություն կրի իր հարազատի գործողությունների համար, Թորոսյանը պատասխանեց. «Հայկ Կոնջորյանը Հայկ Կոնջորյանն է։ Բազմաթիվ մարդիկ ունեն բարեկամներ, հարևաններ ու ընկերներ։ Եթե ինչ-որ մեկը հանցանք է գործել, նա պետք է պատժվի, բայց Հայկի մեղավորությունն այստեղ փնտրելը պարզապես տեղին չէ»։

Թորոսյանը նաև հավելեց, որ չի կարելի մարդուն մեղադրել միայն այն պատճառով, որ նրա ազգակիցը հայտնվել է որևէ պատմության մեջ։ «Եթե քննարկման արդյունքում պարզվի, որ իր եղբոր եղբայրն էլ է մեղավոր, դրա մասին կխոսենք։ Բայց հիմա օդից ենթադրություններ ենք անում միայն այն պատճառով, որ այդ մարդկանց ազգանունները նույնն են»։

Ճեպազրույցի ավարտին նա կրկին շեշտեց, որ իր համար ցանկացած բռնություն կամ էթիկայի նորմերի խախտում անընդունելի է, սակայն որոշումները պետք է կայացվեն փաստերի, այլ ոչ թե ենթադրությունների հիման վրա։

Մանրամասները՝ տեսանյութում։