ՌԴ Արտաքին հետախուզությունը հայտարարել է, թե ԵՄ-ն դեպի իրեն է գրավում Հայաստանին, սակայն «օգնել չի կարող»

Ռուսաստանի Արտաքին հետախուզական ծառայության (ԱՀԾ) մամուլի վարչությունը հայտարարություն է տարածել, թե, իբր, Ծառայության ստացած տեղեկատվության համաձայն՝ Բրյուսելը գիտակցում է  Հայաստանում խորը տնտեսական ճգնաժամի անխուսափելիությունը, եթե Երևանը հայտնվի Եվրասիական տնտեսական միությունից դուրս։

Հայտարությունում նշվում է, թե «եվրասիական ինտեգրացիային մասնակցությունից ստացված եկամուտների զրոյացումը թույլ չի տա ԵՄ-ի ուղղությամբ «թիավարող» Հայաստանի իշխանություններին հույսը դնել ԵՏՄ անդամների վրա՝  կայունությունն ապահովելու համար: Նշվում է, թե «եվրոպական կառույցներն ընդունում են, որ Եվրամիությունում աճող տնտեսական խնդիրները, որոնք առաջացել են հակառուսական պատժամիջոցների քաղաքականությունից և եվրոպացի բյուրոկրատների՝ Ուկրաինայում պատերազմը սատարելու մոլուցքային ցանկության պատճառով», թույլ չեն տա Բրյուսելին փոխհատուցել Երևանի միլիարդավոր ծախսերը: Եվրոպական շատ երկրներ արդեն իսկ ԵՄ ղեկավարությանն ազդանշան են տվել, որ «պատրաստ չեն իրենց շուկաները բացել Հայաստանից ապրանքների համար՝ ի վնաս տեղական արտադրողների»։

«Միաժամանակ, Բրյուսելի բյուրոկրատները կշարունակեն համոզել Երևանին իրենց անվերապահ աջակցության հարցում։ ԵՄ-ն մտադիր է բացատրել կոնկրետ օգնության տրամադրման ուշացումը՝ պնդելով, որ ԵՄ անդամակցությունը լիովին կախված կլինի Երևանից և նրա «ձեռքբերումներից» եվրոպական ինտեգրման ճանապարհին։ Մասնավորապես, Փաշինյանի կառավարության վրա արդեն ճնշում է գործադրվում՝ ռազմավարական ոլորտներում ռուսական բիզնեսի ներկայությունը նվազեցնելու, Ռուսաստանի հետ մարդասիրական կապերը խզելու և դրա դեմ հանդես եկող ներքին հակառակորդներին ճնշելու համար։ Այս մոտեցումը նախատեսվում է խրախուսել՝ մանիպուլացնելով Հայաստանի քաղաքացիների համար վիզայի ազատականացման հեռանկարով և խոստանալով «հիանալի հեռավոր ապագայում» Հայաստանը վերածել «աշխարհի բարգավաճ խաչմերուկի»»,- ասվում է հայտարարության մեջ։

Նշենք, որ այս հայտարարությունը հաջորդում է ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հեռախոսազրույցին։ Զրույցի ընթացքում Փաշինյանն ընդգծել էր, որ հայաստանյան ծագման ապրանքների՝ ՌԴ շուկա արտահանման սահմանափակումները հակասում են Հայաստան-Ռուսաստան իրավապայմանագրային շրջանակին ու Եվրասիական տնտեսական միության կարգավորումներին, և խնդրել է միջոցներ ձեռնարկել այս խնդիրները կարգավորելու ուղղությամբ։

Թարգմանությունը՝ Էմմա Չոբանյանի