05.09.2026 | 17:31
1,4 միլիոն ֆայլ․ հաքերները հրապարակել են Բեռլինի Սենատից գողացված տվյալները
131 ԱԹՍ է արձակվել Ուկրաինայի ուղղությամբ․ Ռուսաստանը հայտնել է երկու նավի հարվածելու մասին
Քաղաքականություն
28.07.2026 | 13:04
Ռուսական զորքերը հուլիսի լույս 28-ի գիշերն Ուկրաինայի վրա արձակել են 131 անօդաչու թռչող սարք, որոնցից 107-ը խոցվել է։ Այս մասին հայտնել են Ուկրաինայի ռազմաօդային ուժերը, գրում է Current time-ը։
Դնեպրոպետրովսկի մարզային ռազմական վարչակազմի ղեկավար Ալեքսանդր Գանժան հայտնել է, որ Նիկոպոլի շրջանում ռուսական հարվածների հետևանքով մեկ տուժած կա։ Բացի այդ, վնասվել է գյուղատնտեսական ձեռնարկություն, բենզալցակայան և խանութ, իսկ Կամենսկի շրջանում՝ ենթակառուցվածքներ։
Ռուսական կողմը անօդաչու թռչող սարքով Խերսոնի Դնեպրովսկի շրջանում հարվածել է միկրոավտոբուսի, վիրավորվել է 62-ամյա մի կին: Քաղաքի ռազմական վարչակազմի ղեկավար Յարոսլավ Շանկոյի խոսքով՝ տուժածը քայլում էր մեքենայի մոտով: Վարորդը և ուղևորները չեն տուժել, սակայն միկրոավտոբուսի դիմապակին կոտրվել է:
Խերսոնի տարածաշրջանային ռազմական վարչակազմի ղեկավար Ալեքսանդր Պրոկուդինը հայտնել է, որ վերջին 24 ժամվա ընթացքում Ռուսաստանը հարձակվել է կրիտիկական և սոցիալական ենթակառուցվածքների, ինչպես նաև տարածաշրջանի բնակավայրերի բնակելի թաղամասերի վրա՝ վնասելով երեք բարձրահարկ շենք և ութ մասնավոր տուն: Երեք մարդ զոհվել է, ևս 10-ը՝ վիրավորվել:
Ռուսաստանի Պաշտպանության նախարարությունը հայտարարել է, որ հուլիսի 28-ի առավոտյան ռուսական ուժերը շարունակել են «հարվածներն ուկրաինական նավահանգիստներին և Ուկրաինայի զինված ուժերի շահերին ծառայող նավերին»։
«Հարվածային անօդաչու թռչող սարքերը հարվածել են Սև ծովի հյուսիս-արևմուտքում ռազմական բեռներ տեղափոխող բեռնատար նավի։ Նիկոլաևի նավահանգստում հարված է հասցվել կիլեկտորային նավի»,- պնդել է նախարարությունը։
Ուկրաինան դեռևս չի մեկնաբանել այս տեղեկատվությունը։
Թարգմանությունը՝ Էմմա Չոբանյանի
