27.09.2026 | 22:05
ՏԻՄ ընտրություններում մասնակցության ամենաբարձր ցուցանիշը Թումանյանում է. այստեղ առաջադրված միակ ուժը ՔՊ-ն էր
Իտալիայում տղամարդը կեղծ հին ամֆիթատրոն է կառուցել և 20 տարի զբոսաշրջիկների խաբել․ նա ազատազրկման է դատապարտվել
Քաղաքականություն
27.07.2026 | 22:30
Իտալիայի Վիչենցա նահանգում դատարանը 28 ամսվա ազատազրկման է դատապարտել տեղի բնակիչ Ֆրանկո Մալոսոյին, որը շուրջ 20 տարի զբոսաշրջիկներին ներկայացրել է իր իսկ կառուցած կեղծ «հնագույն» ամֆիթատրոնը՝ որպես արժեքավոր հնագիտական հայտնագործություն։ Այս մասին փոխանցում է DW-ի ռուսական ծառայությունը։
Մալոսոն պնդում էր, թե 2005 թվականին սողանքի հետևանքով հայտնաբերել է այսպես կոչված «Բերիկյան ծովային ամֆիթատրոնը», որը, ըստ նրա, կառուցվել է մ.թ. IV-V դարերում և ժամանակին այցելել է անգամ Հուլիոս Կեսարը։ Նա զբոսաշրջիկների համար կազմակերպում էր էքսկուրսիաներ՝ յուրաքանչյուր մասնակցից գանձելով 40 եվրո։ Ամֆիթատրոնը նույնիսկ ընդգրկվել էր պաշտոնական զբոսաշրջային ուղեցույցում և Եվրամիության ֆինանսավորմամբ ստեղծված բջջային հավելվածում։
Սակայն պատմաբանները ուշադրություն էին հրավիրել ակնհայտ անհամապատասխանության վրա․ Հուլիոս Կեսարը ապրել է մոտ 400 տարի ավելի վաղ, քան, ըստ ներկայացված վարկածի, կառուցվել էր ամֆիթատրոնը։
Ոստիկանության նախաձեռնած քննության ընթացքում ուսումնասիրվել են արբանյակային լուսանկարներ և իրականացվել հնագիտական փորձաքննություն։ Պարզվել է, որ «հնագույն» կառույցը 2000-ականների սկզբին կառուցել է հենց Մալոսոն՝ հարթեցնելով բլրի մի հատված և օգտագործելով սվաղված բլոկներ, ապակեպլաստիկ և պապիե-մաշե։
Գործի քննությունը շարունակվել է 2016 թվականից։ Դատարանը Մալոսոյին մեղավոր է ճանաչել ապօրինի շինարարության և արվեստի գործերի կեղծման համար՝ դատապարտելով 28 ամսվա ազատազրկման և 3000 եվրո տուգանքի։ Բացի այդ, տարածաշրջանի իշխանությունները նրանից պահանջում են շուրջ 560 հազար եվրոյի փոխհատուցում։
