Իրանն ադրբեջանական պետական AzTV-ն ներառել է «թշնամական լրատվամիջոցների» ցուցակում․ ի պատասխան՝ Բաքուն անօրինական է ճանաչել իրանական Səhər-ն ու Mehr-ը

Իրանի հետախուզության նախարարության կողմից մի քանի օտարերկրյա լրատվամիջոցներ, այդ թվում՝ ադրբեջանական AzTV պետական ​​հեռուստաալիքը «թշնամական լրատվամիջոցների» ցուցակում ներառելը և այդ մարմինների հետ համագործակցողների համար քրեական պատասխանատվություն սահմանելը զարմանալի է։ Ադրբեջանական լրատվամիջոցների հաղորդմամբ՝ այս մասին ասվում է Ադրբեջանի լրատվամիջոցների զարգացման գործակալության (MEDIA) հայտարարության մեջ։

Նշվում է, որ Ադրբեջանը, լրագրողների մասնագիտական ​​գործունեությունը պաշտպանելու հանձնառությունը պահպանելով հանդերձ, նաև ապահովում է փոխադարձության սկզբունքի կիրառումը։

«Այսպիսով, լրատվամիջոցների մասին օրենքի 11.4 հոդվածի համաձայն՝ եթե այլ պետություններ հատուկ սահմանափակումներ են սահմանում լրատվամիջոցների ռեեստրում ընդգրկված լրագրողների մասնագիտական ​​գործունեության համար, նմանատիպ սահմանափակումներ կարող են սահմանվել նաև Ադրբեջանում այդ սահմանափակումները սահմանած պետության լրագրողների նկատմամբ»,- ասվում է գործակալության հայտարարությունում։

MEDIA-ն հայտարարել է, որ համապատասխան հոդվածի պահանջների և փոխադարձության սկզբունքի համաձայն՝ Ադրբեջանի ազգային շահերին հակասող և երկրի ինքնիշխանության, սահմանադրական կարգի, տարածքային ամբողջականության և ազգային անվտանգության դեմ քարոզչություն ծավալող լրատվամիջոցների՝ Səhər հեռուստաալիքի և Mehr լրատվական գործակալության, ինչպես նաև Ադրբեջանում նրանց ներկայացուցիչների գործունեությունը համարվում է անօրինական։

«Մենք կոչ ենք անում Ադրբեջանում գործող բոլոր լրատվամիջոցներին և լրագրողներին զերծ մնալ վերոնշյալ լրատվամիջոցների և նրանց ներկայացուցիչների հետ համագործակցությունից, որոնք գործում են մեր երկրի ազգային շահերի դեմ։ Մենք ևս մեկ անգամ ընդգծում ենք, որ լրատվամիջոցների ոլորտում միջազգային համագործակցությունը պետք է իրականացվի բացառապես փոխադարձ հարգանքի և լրագրողների մասնագիտական ​​անկախության հիման վրա»,- ասվում է հայտարարության մեջ։

Թարգմանությունը՝ Էմմա  Չոբանյանի