05.09.2026 | 15:55
ԱՆ-ն առաջարկում է լուծարել հարկային հաշվետվություն չներկայացրած ընկերությունները
Թուրքիայի F-16-ները պարեկություն կիրականացնեն Բալթիկ ծովի օդային տարածքում
Քաղաքականություն
27.07.2026 | 17:49
Հինգ F-16 կործանիչներ և անձնակազմի 76 անդամներ շուտով կթռչեն Էստոնիա․ թուրքական ռազմաօդային ուժերը պատրաստվում են ՆԱՏՕ-ի գործողության շրջանակում Բալթյան տարածաշրջանում օդային պարեկության առաքելություն իրականացնել, հայտնում են տեղական լրատվամիջոցները։
Ինքնաթիռները և դրանց անձնակազմը շարունակում են նախապատրաստվել կարևոր առաջադրանքի, որը տեղի է ունենում տարածաշրջանում Ռուսաստան-Ուկրաինա հակամարտության տարածման վտանգի վերաբերյալ մտահոգությունների աճի ֆոնին: «Pars (Leopard) էսկադրիլիա» անվանումով հայտնի ստորաբաժանումն այժմ տեղակայված է Թուրքիայի հարավ-արևելքում գտնվող Դիարբեքիրի բազայում: Այն կտեղակայվի Էստոնիայի Ամարի ավիաբազայում, որը չունի սեփական կործանիչները՝ ի տարբերություն Բալթյան մյուս երկրների՝ Լիտվայի և Լատվիայի:
Անձնակազմերն Էստոնիայում կլինեն օգոստոսից մինչև նոյեմբեր՝ շուրջօրյա արագ արձագանքման տագնապի առաքելությունների համար՝ հետևելով օդային տարածքի խախտումներին:
Էսկադրիլիայի հրամանատար, փոխգնդապետ Օզդեմիրն ասել է, որ թուրքական առաքելությունը կդիտարկի օդային տարածքի խախտումներն ու կարձագանքի անհայտ թռչող սարքերին։
«Pars-ը էսկադրիլիա է, որը բազմիցս ապացուցել է իր արդյունավետությունն ինչպես ներքին, այնպես էլ միջազգային առաքելություններում։ Մենք վստահ ենք, որ այս խնդիրը կկատարենք լավագույնս և կներկայացնենք Թուրքիան Բալթյան երկնքում»,- հավելել է նա։
Բալթյան օդային ոստիկանության առաքելության շրջանակում երկնքի անվտանգությունն այստեղ ապահովում են ՆԱՏՕ-ի անդամ երկրները 2004 թվականից ի վեր, երբ Էստոնիան, Լատվիան և Լիտվան միացել են դաշինքին։ ՆԱՏՕ-ի անդամ երկրները, որոնք ունեն անհրաժեշտ կարողություններ, կամավոր կերպով մասնակցում են Բալթյան օդային ոստիկանության առաքելությանը, որի պատասխանատվությունը փոխվում է չորս ամիսը մեկ։
Առաքելության առաջին տեղակայումից՝ 2004 թվականից ի վեր, ՆԱՏՕ-ի կործանիչները տեղակայված են Լիտվայի Շիաուլյայի ավիաբազայում։ 2014 թվականից ի վեր ՆԱՏՕ-ի ինքնաթիռներ են տեղակայվել նաև Էստոնիայի Ամարի ավիաբազայում, իսկ 2024-ից դրանք կարող են գործել նաև Լատվիայի Լիելվարդեի ավիաբազայից։
ՆԱՏՕ-ի օդային ոստիկանության առաքելության շրջանակում Թուրքիայի ռազմաօդային ուժերն իրականացրել են ուժեղացված օդային ոստիկանության առաքելություններ Լեհաստանում 2021 թվականի հուլիսի 6-ից սեպտեմբերի 15-ը և Ռումինիայում 2023 թվականի նոյեմբերի 30-ից մինչև 2024 թվականի ապրիլի 2-ը։ Թուրքիան նաև նախատեսում է մասնակցել Ռումինիայում օդային ոստիկանության առաքելությանը 2026 թվականի դեկտեմբերից մինչև 2027-ի մարտը։
Թարգմանությունը՝ Էմմա Չոբանյանի
