Ծառուկյանի գործով արդարադատության հետ գործ չունենք, սա քաղաքական հետապնդում է. Արա Այվազյան. ՏԵՍԱՆՅՈՒԹ

ԲՀԿ առաջնորդ Գագիկ Ծառուկյանի հարցաքննությանը զուգահեռ Քննչական կոմիտեի դիմաց այսօր հավաքվել են ոչ միայն նրա կուսակիցները և աջակիցները, այլև ընդդիմադիր մյուս ուժերի որոշ ներկայացուցիչներ։

Արտաքին գործերի նախկին նախարար Արա Այվազյանը Գագիկ Ծառուկյանի շուրջ տեղի ունեցող իրավական գործընթացները որակեց որպես բացառապես քաղաքական հետապնդում և ռեպրեսիա:

«Այս գործընթացների մեկնարկը տրված էր դեռ ընտրարշավի ժամանակ երկրի վարչապետի կողմից, և ցավալիորեն իրավապահ կառույցները կատարում են իրենց իջեցված հանձնարարականը: Սա ամենամեծ հարվածն է Հայաստանի ժողովրդավարությանը, և մենք կոչ ենք արել մեր միջազգային գործընկերներին, որպեսզի արձագանքեն, որովհետև բոլոր դեմոկրատական երկրները ջատագովում են ժողովրդավարական արժեքները: Ամենակարևոր ժողովրդավարական արժեքն այն է, որ մեկ անձը կամ մեկ ուժը չի կարող կենտրոնացնել իր մեջ բոլոր գործառույթները՝ օրենսդիր, գործադիր և դատական: Ցավոք սրտի, այսօր Հայաստանում բոլոր այդ գործառույթները կենտրոնացել են մեկ անձի ձեռքում, և սա ամենամեծ հարվածն է ժողովրդավարության համար: Այնպես որ, բոլորի համար ակնհայտ է, որ այստեղ մենք արդարության և արդարադատության հետ գործ չունենք, սա քաղաքական հետապնդում է»,- նշեց Այվազյանը։

Անդրադառնալով իշխանությունների՝ ժողովրդավար լինելու պնդումներին՝ Այվազյանը նշեց, որ միջազգային հանրությունը ևս սկսելու է վերանայել իր մոտեցումները: Ըստ նրա՝ աջակցել թույլ և սեփական ժողովրդի կողմից մերժվող իշխանությանը, ի վերջո, հարվածելու է նաև հենց արտաքին դերակատարների շահերին: Քաղաքական գործիչը նաև մտահոգություն հայտնեց, որ «երկրում սերմանվող վախի մթնոլորտը և այլախոհներին ոչնչացնելու մարտավարությունը մահացու կարող է լինել պետականության համար»: Նա ընդգծեց, որ Հայաստանն այսօր գտնվում է երեք խոր ռազմավարական ճգնաժամերի՝ ներքին անկայունության, տարածաշրջանային և համաշխարհային ցնցումների կիզակետում:

«Որպեսզի կարողանանք հաղթահարել այս ճգնաժամերը, մեզ նախևառաջ ներքին համերաշխություն է պետք, ոչ թե քաղաքական ռեպրեսիաներ: Հայաստանը կամաց-կամաց վերածվում է համակենտրոնացման ճամբարի, ինչն արդեն ակնհայտ է բոլորի համար»,- եզրափակեց Արա Այվազյանը:

Մանրամասները՝ տեսանյութում։