23.07.2026 | 22:53
Կոնֆերենցիաների լիգա. «Նոան» խուսափեց պարտությունից
ԱՄՆ Պետդեպը հայտարարել է, որ Թուրքիան չի կարող F-35-եր ստանալ, քանի դեռ պահպանում է ռուսական C-400-ները
Քաղաքականություն
23.07.2026 | 22:02
ԱՄՆ Պետքարտուղարությունը նամակով Կոնգրեսին հայտնել է, որ Թուրքիան չի կարող ստանալ F-35 կործանիչներ, եթե չհրաժարվի ռուսական արտադրության C-400 հակաօդային պաշտպանության համակարգից և չկատարի այլ իրավական պահանջները։ ԱՄՆ օրենսդրությունը դեռևս խոչընդոտում է վաճառքը՝ չնայած նախագահ Դոնալդ Թրամփի խոստմանը՝ վերացնել պատժամիջոցները, ինչպես նաև հայտարարությանը, որ Վաշինգտոնը կքննարկի Անկարային ինքնաթիռների գնումը թույլ տալու հարցը, գրում է Turkish Minute-ը։
Հուլիսի 22-ի նամակը, որը հայտնվել է հունական Kathimerini-ի տրամադրության տակ, պատրաստվել է Պետքարտուղարության կողմից Սպիտակ տան անունից՝ ի պատասխան դեմոկրատ կոնգրեսական Ուեսլի Բելի՝ ծրագրին Թուրքիայի հնարավոր վերադարձի վերաբերյալ հարցմանը։
Պետդեպը նշել է, որ ԱՄՆ օրենսդրությունն արգելում է F-35 ինքնաթիռների փոխանցումը Թուրքիային, քանի դեռ այն չի բավարարել Countering America’s Adversaries Through Sanctions Act (CAATSA) և այլ իրավական դրույթների պահանջները։
Այդ պայմանները ներառում են ռուսական արտադրության C-400 հակաօդային պաշտպանության համակարգի և դրա հետ կապված սարքավորումների դուրսբերում իր տիրապետությունից, ապագայում նմանատիպ համակարգեր ձեռք չբերելու պարտավորություն և մնացած հավաստագրման պահանջների կատարում։
«Թուրքիան դեռևս չի կատարել այս պայմանները»,- ասվում է նամակում:
Նշվում է, որ Վաշինգտոնի և Անկարայի միջև С-400-ի շուրջ վեճի լուծման վերաբերյալ քննարկումները շարունակվում են, ասվում է նաև, որ ցանկացած համաձայնագիր պետք է լինի «թափանցիկ, օրինական և համապատասխանի ԱՄՆ ազգային անվտանգության շահերին»։
Հայտարարությունը հակասում է նախագահ Թրամփի կողմից այս ամսվա սկզբին Անկարայում ՆԱՏՕ-ի գագաթնաժողովի ժամանակ նախագահ Ռեջեփ Թայիփ Էրդողանի հետ հանդիպումից հետո արված մեկնաբանություններին, երբ Սպիտակ տան ղեկավարը հայտարարել էր, որ Թուրքիան կստանա F-35 կործանիչներ։
Պետքարտուղարությունը նաև Թուրքիային բնութագրել է որպես ՆԱՏՕ-ի կարևոր դաշնակից և նշել, որ Միացյալ Նահանգները կշարունակի համագործակցել Անկարայի հետ համատեղ շահերի ոլորտներում՝ միաժամանակ պատասխանատվության ենթարկելով նրան, երբ նրա գործողությունները հակասում են ԱՄՆ-ի շահերին։
F-35-ի հարցից զատ՝ նամակում ներկայացվել է ԱՄՆ-Թուրքիա հարաբերությունների ավելի լայն շրջանակ՝ նշելով, որ Թուրքիան աջակցել է ԱՄՆ դիվանագիտական ջանքերին՝ Ռուսաստանի և Ուկրաինայի, Ադրբեջանի և Հայաստանի, Գազայի հետ կապված, ինչպես նաև ԻԼԻՊ-ի դեմ տարածաշրջանային հակաահաբեկչական գործողություններին։
Թարգմանությունը՝ Էմմա Չոբանյանի
